Marqakólde laı kóshkini opyryp ketken jol qalpyna keltirildi – ShQO

ÓSKEMEN. KAZINFORM – Shyǵys Qazaqstan oblysy Marqakól aýdanynda laı kóshkini opyryp ketken jol qalpyna keltirildi.

Eske salsaq, 12 sáýir kúni Marqakól aýdanyndaǵy Mramornoe asýy mańynda laı kóshkini júrip, oblystyq mańyzy bar jol opyrylyp túsken.

Azamattardyń qaýipsizdigin qamtamasyz etý úshin atalmysh jol bóligi jabylyp, jedel qaıta keltirý jumystary bastalǵan edi.

«Shyǵys Qazaqstan oblysynyń ákimi Ermek Kósherbaev sý tasqyny kezeńin áýeden baqylaý barysynda «Terekti-Urynhaı-Tósqaıyń» trassasynyń 13 shaqyrymyndaǵy buzylǵan joldy qalpyna keltirý jumystarymen tanysty. Eki kúnniń ishinde jóndeý jumystary aıaqtalyp, búgin saǵat 16:00-de jol ashylǵan. Osylaısha, kólik qozǵalysy qaıta jandandy», - dep habarlady óńir ákiminiń baspasóz qyzmetinen.

Qazirde aımaq basshysynyń tapsyrmasymen jol qyzmetiniń mamandary topyraqtaǵy ylǵal kólemin eseptep, basqa aýmaqtarda osyndaı jaǵdaı qaıtalabas úshin qadaǵalaý júrgizýde.

Jalpy oblys boıynsha qar áli de kólemdi jatyr. Buqtyrma, Úlbi, Úbe, Turǵysyn, Kúrshim, Qaljyr jáne Hamır ózenderinde sý deńgeıi kóterilýi yqtımal. Sondyqtan óńir ákimdigi halyqty tasqynnyń ekinshi kezeńine daıyn bolýǵa shaqyrdy.