Marqakól orman sharýashylyǵynda shyqqan órt oqshaýlandy
ÓSKEMEN. KAZINFORM – Shyǵys Qazaqstan oblysyndaǵy Marqakól orman sharýashylyǵynda shyqqan órttiń beti qaıtty.
ShQO Tótenshe jaǵdaılar departamenti baspasóz qyzmetiniń málimetine súıensek, Marqakól aýdanyndaǵy «Marqakól orman sharýashylyǵy» KMM aýmaǵynda ornalasqan Aqjaılaý ormanshylyǵynda taýly jerde shóp pen butalar janǵan.
- Tilsiz jaýdy aýyzdyqtaýǵa TJM bólimsheleriniń, orman sharýashylyǵynyń, «Qazavıaormanqorǵaý» qyzmetiniń kúshteri men quraldary jáne QR TJM «Qazavıaqutqarý» avıatsııasy jumyldyryldy. Búgin órt búkil aýmaqta oqshaýlandy, - delingen aqparatta.
TJM tikushaqtarymen 9 ret sý tógildi. Sýdyń jalpy kólemi 4,5 tonnany quraıdy.
Qazirgi ýaqytta jaǵdaı baqylaýda. Oqıǵa ornyndaǵy jumystar jalǵasyp jatyr.
Eske salsaq, osyǵan deıin Marqakóldegi orman órtine 70 maman men eki tikushaq jumyldyrylǵany habarlanǵan.
