Mark Tsýkerberg tsıfrlyq «egizin» jasap jatyr

ASTANA. KAZINFORM — Meta kompanııasynyń basshysy Mark Tsýkerberg qyzmetkerlermen til tabysa alatyn jáne basqarý fýnktsııalaryn jartylaı oryndaıtyn óziniń tsıfrlyq kóshirmesin jasap jatyr, dep habarlaıdy TASS.

Mark Tsýkerberg jasandy ıntellekt negizindegi tsıfrlyq «egizin» jasaýmen aınalysyp jatyr. Ol óziniń jasandy syńaryna jumys mindetteriniń bir bóligin júkteýdi josparlap otyr.

Bloomberg málimetinshe, bul nusqa Meta ázirleıtin vırtýaldy keıipkerler tehnologııalary arqyly qolǵa alynǵan.

Jasandy ıntellekt Tsýkerbergtiń sóıleý stılin, minez-qulqyn jáne kópshilik aldyndaǵy sóz sóıleý erekshelikterin qaıtalaýǵa, sondaı-aq onyń kompanııa strategııasyna qatysty kózqarastaryn eskerýge úıretiledi.

Meta qyzmetkerleri jospar boıynsha basshynyń vırtýaldy nusqasymen ózara baılanys ornata alady. Bul kompanııa ishindegi qarym-qatynasty nyǵaıtyp, qyzmetkerlerdiń jumys protsesine kóbirek qatysýyna kómektesýi múmkin.

Mark Tsýkerberg bul JI-egizi arqyly komandamen keri baılanysty jaqsartyp, jańa ónimderdi ázirleýge kóbirek ýaqyt bólýdi kózdeıdi.

Alaıda sarapshylar birqatar qaýipti atap ótti. Olar vırtýaldy basshy men qyzmetkerler arasyndaǵy qashyqtyqtyń artýy, sondaı-aq jasandy ıntellektiniń emotsııany tolyq túsinip, empatııany talap etetin sheshimder qabyldaý qabileti týraly suraqtardy kóterdi.

Aıta keteıik, 75 quqyq qorǵaý uıymynan quralǵan koalıtsııa Meta kompanııasyn Ray-Ban smart glasses jáne Oakley smart glasses qurylǵylaryna bet-álpetti taný fýnktsııasyn engizýden bas tartýǵa shaqyrdy.