Mark Rıýtte NATO bas hatshysy bolyp bekitildi
ASTANA. KAZINFORM – NATO-ǵa múshe elder alıanstyń jańa bas hatshysy etip Nıderland premer-mınıstri Mark Rıýtteni saılady. Ol qazan aıynda norvegııalyq Iens Stoltenbergtiń ornyna keledi. Bul týraly alıanstyń tıisti málimdemesinde jarııalandy.
– Soltústik Atlantıkalyq keńes Nıderland premer-mınıstri Mark Rıýtteni NATO-nyń kelesi Bas hatshysy etip taǵaıyndaý týraly sheshim qabyldady, ol osy laýazymda Iens Stoltenbergtiń ornyna keledi, - delingen NATO saıtynda.
Iens Stoltenberg «NATO odaqtastarynyń tańdaýyn jyly qabyldady». Ol Rıýtti transatlantık, kúshti kóshbasshy jáne konsensýs qurýǵa qabiletti adam retinde sıpattady.
– Men oǵan NATO-ny odan ári nyǵaıtýda tabys tileımin, - dep jazdy Stoltenberg X áleýmettik jelisinde.
Aıta keteıik, Mark Rıýtte – 57 jasta. Ol 2010 jyldyń qazan aıynan beri Nıderlandy úkimetin basqaryp keledi. 2023 jylǵa deıin ol ońshyl lıberaldyq partııanyń jetekshisi boldy. 2023 jyly premer-mınıstr óz úkimetiniń otstavkaǵa ketetinin jarııalady. Sebebi koalıtsııa kóshi-qondy ulǵaıtý týraly kelisimge kele almady. Onyń úkimeti jańa mınıstrler kabıneti taǵaıyndalǵanǵa deıin qyzmetinde qalady.
Iens Stoltenberg – 65 jasta. NATO-ny 2014 jyldan beri basqaryp keledi. Onyń tórt jyldyq eki merzimi 2022 jyldyń qazan aıynda aıaqtaldy. Biraq odaqtastary Reseı-Ýkraına qaqtyǵysyna baılanysty onyń merzimin eki ret uzartty. NATO Bas hatshysy bolyp taǵaıyndalǵanǵa deıin Stoltenberg Norvegııanyń premer-mınıstri boldy jáne federaldy úkimette basqa da qyzmetterdi atqardy. Ol sotsıal-demokratııalyq eńbek partııasyn basqardy.
