Mark Tsýkerberg San-Frantsısko aýrýhanasyna 75 mln. dollar qaıyrymdylyq qarjyny syıǵa tartty
ASTANA. QazAqparat - Álemdegi eń iri Facebook áleýmettik jelisiniń bas dırektory Mark Tsýkerberg pen onyń zaıyby Prıstsılla Chan San-Frantsıskodaǵy aýrýhanalardyń birine 75 mln. dollardy qaıyrymdylyqpen syıǵa tartty, dep habarlady TASS.
«Bul aqshanyń biz úshin úlken mańyzy bar. Olar jańa jansaqtaý bólimi men travmatologııa ortalyǵynyń qurylysyna jumsalady», - delingen medıtsınalyq mekemeniń málimdemesinde. Tsýkerbergtiń járdemi 1994 jyly ashylǵan aýrýhananyń tarıhyndaǵy eń úlken qaıyrymdylyq sharasy boldy.
Facebook-tiń negizin qalaýshy ol bergen qarajat medıtsınalyq qyzmetterdi San-Frantsıskonyń barlyq turǵyndary úshin odan da qoljetimdi etetinin atap ótti. «Biz árbir adam sapaly medıtsınalyq qyzmet kórsetýge qol jetkizýi tıis dep oılaımyz. San-Frantsısko - bizdiń úıimiz, biz munda turyp, ómir súrýdemiz, sondyqtan adamdarǵa paıda tıgizgimiz keledi», - dep túsindirdi óz áreketin Tsýkerberg.
Forbes jýrnalynyń málimetterinshe, 30 jastaǵy Tsýkerberg Amerıkanyń eń jomart mıllıarderleriniń tiziminde tórtinshi orynda tur. 2013 jyly ol Kremnıı alqaby qorlarynyń birine áleýmettik jeliniń aktsııalary túrinde 991 mln. dollar bergen. Bul aqsha negizinen túrli bilim berý baǵdarlamalaryna jumsalǵan. Budan basqa, ótken jyldyń sońynda Tsýkerberg Batys Afrıkada Ebola indetinen týyndaǵan aýrýmen kúreske 25 mln. dollar bóldi.
