Mark Tsýkerberg qytaı tilinde erkin sóıleıtinin pash etti
ASTANA. QazAqparat - Facebook basshysy Beıjińde Tsınhýa ýnıversıtetinde qytaı tilinde erkin sóıleıtinin kórsetti. Tsýkerberg bul beınejazba úzindisin Facebook-taǵy óziniń paraqshasyna salǵan.
Facebook-tyń negizin qalaýshy jáne bas dırektory 22 qazanda 30 mınýttyq suraq-jaýap sessııasyna qatysty. Tsýkerberg qytaı tiliniń mandarındik dıalektisinde sóıledi.
Onyń jazbasyna pikir bildirgen qytaılyq ǵalamtor paıdalanýshylary Tsýkerberg shynymen de qytaı tilinde erkin sóıleıtinin, tipti áziliniń ózi kóńilge qonymdy ekenin jazady. Mark Tsýkerberg óz qalaýymen qytaı tilin 2010 jyldan bastap úırene bastaǵan, dep jazdy Mashable.
«Qytaı mádenıetine degen qyzyǵýshylyǵym erekshe boldy, ony tereń tanyp-bilý úshin tildi bilý asa mańyzdy», - deıdi ol.
Tsýkerbergtiń aıtýynsha, suraq-jaýap sessııasy barysynda adamdardy ǵalamtor jelisine kóptep tartý, Internet.org jobasy jáne Facebook-tyń damý kezeńderi talqylandy.
Aıta keteıik, Tsýkerbergtiń jubaıy Prıstsılla Chan amerıkandyq qytaı qyzy.
