Marııa Mýdrıaktyń Úlken teatrda kórsetken ónerin reseılik synshylar joǵary baǵalady
ASTANA. QazAqparat - «Astana Opera» teatrynyń solısi Marııa Mýdrıak Reseıdiń áıgili Úlken teatrynyń sahnasynda alǵash ret óner kórsetti, dep habarlaıdy QazAqparat Astana Opera teatrynyń baspasóz qyzmetine silteme jasap.
Ártis shildeniń 25, 27 jáne 29 kúnderi Djakomo Pýchchınıdiń «Bogema» operasynyń premerasynda Mımı bas partııasyn oryndady. Osy maýsymnyń sońǵy tusaýkeseri orasan zor tabysqa keneldi. Tyńdarmandar, qyraǵy synshylar men BAQ ókilderi klassıkalyq úlgidegi qoıylymǵa tańǵalystaryn bildirip jatty.
«Moskovskıı komsomolets» kórnekti basylymynyń betterinde synshy ári jýrnalıst Ekaterına Kretova qazaqstandyq opera ánshisiniń oryndaýshylyq ónerin bylaısha sıpattada:
"Mımı partııasyndaǵy Marııa Mýdrıak - ótken opera maýsymyndaǵy jeke-dara úlken qubylys. Ǵajap daýys. Jigerli, óte ádemi, tereń tynysty daýys ári tap-taza daýys yrǵaǵyn aqylmen baqylaýǵa baǵyndyrǵan. Sonymen birge 24 jasar ánshi qııalǵa bergisiz kórkem de sulý, bul onyń keıipkerine erekshe súıkimdilik pen kınematografııalyq shynshyldyq bere túsedi", - dep jazylǵan maqalada.
Jańa sahnalyq nusqa avtor - uly kompozıtor Djakomo Pýchchınıdiń 160 jyldyǵyna oraılastyrylǵan. Operany jasaýǵa halyqaralyq komanda atsalysty. Spektakldiń qoıýshy-rejısseri - Jan-Roman Vesperını (Frantsııa), qoıýshy-dırıjeri - Evan Rodjıster (AQSh). Stsenograf - Brýno de Lavener, kostıýmder boıynsha sýretshi - Sedrık Tırado, jaryq boıynsha sýretshi - Krıstof Shopen, beıne proektsııalar boıynsha sýretshi - Eten Gıol.
Mımıdiń ǵashyǵy - Rýdolftyń rólin ıtalıandyq tenor Davıde Djýstı somdady.
Esterińizge sala ketsek, Marııa Mýdrıak Mımı partııasynda alǵash ret 2016 jyly «Astana Opera» teatrynyń sahnasynda óner kórsetken bolatyn.
