Marııa Hadjıeva Qazaqstannyń bas qarjy ombýdsmany bolyp saılandy
ASTANA. KAZINFORM — Qazaqstanda biryńǵaı Qarjy ombýdsmany qyzmeti qalyptasty. Jańa ınstıtýt jumysyn 2027 jylǵy 1 qańtardan bastaıdy, dep habarlaıdy Qarjy naryǵyn retteý jáne damytý agenttiginiń baspasóz qyzmeti.
Qarjy ombýdsmany qyzmeti keńesiniń otyrysynda bas qarjy ombýdsmany jáne bank, mıkroqarjy, saqtandyrý salalary men baǵaly qaǵazdar naryǵyndaǵy ombýdsmandar saılandy.
Saılaý «Qazaqstan Respýblıkasynyń keıbir zańnamalyq aktilerine qarjy naryǵyn retteý jáne damytý, baılanys jáne bankrottyq máseleleri boıynsha ózgerister men tolyqtyrýlar engizý týraly» 2026 jylǵy 16 qańtardaǵy Qazaqstan Respýblıkasynyń Zańyn iske asyrý sheńberinde ótkizildi.
— Bas qarjy ombýdsmany jáne qyzmetin qosa atqaratyn baǵaly qaǵazdar naryǵyndaǵy qarjy ombýdsmany bolyp Marııa Jamalovna Hadjıeva saılandy. Qarjy naryǵynda retteý men qadaǵalaýda kóp jyldyq tájirıbesi bar. Ádilet mınıstrliginde, Ulttyq Bankte jáne qarjylyq qadaǵalaý organdarynda jumys istegen. 2019-2025 jyldary Qarjy naryǵyn retteý jáne damytý agenttigi tóraǵasynyń orynbasary qyzmetin atqarǵan, — delingen agenttik taratqan aqparatta.
Bank salasyndaǵy qarjy ombýdsmany bolyp Rýslan Farhatuly Ibragımov saılandy. Zań jáne qarjylyq bilimi, bank sektoryndaǵy problemalyq qaryzdarmen jumys tájirıbesi bar. 2016 jyldan beri bank ombýdsmany keńsesinde jumys isteıdi.
Mıkroqarjy salasyndaǵy qarjy ombýdsmany bolyp Nazgúl Qarasqyzy Esteýsizova saılandy. Joǵary ekonomıkalyq jáne zań bilimi, zań ǵylymdarynyń magıstri dárejesi bar. Bank sektorynda jumys istegen, Qazaqstannyń Ulttyq kollektorlar palatasyn jáne qaryz alýshylardyń quqyqtaryn qorǵaý jónindegi áleýmettik jobany basqarǵan. 2024 jylǵy jeltoqsannan beri mıkroqarjy ombýdsmany bolyp tabylady.
Saqtandyrý salasyndaǵy jáne baǵaly qaǵazdar naryǵyndaǵy qarjy ombýdsmany bolyp Qanat Tólegenuly Álıǵulov saılandy. Onyń ekonomıkalyq jáne zań bilimi, zalaldardy retteý jáne saqtandyrý tólemderi bólimshelerin basqarý tájirıbesi bar. Ol «Nomad Inshýrans» jáne Freedom Finance Insurance saqtandyrý kompanııalarynda jumys istegen, saqtandyrý jaǵdaılaryn retteýdi avtomattandyrýǵa jáne tsıfrlyq klıenttik servısterdi damytýǵa qatysqan.
Biryńǵaı qarjy ombýdsmany qyzmeti qoldanystaǵy bank, mıkroqarjy jáne saqtandyrý ombýdsmandary ınstıtýttaryn biriktirip jáne tutynýshylardy qorǵaý tetigin brokerlik kórsetiletin qyzmetterge qoldana otyryp, 2027 jylǵy 1 qańtardan bastap jumysyn bastaıdy.
— Qarjy ombýdsmany qyzmetiniń aldynda qarjylyq kórsetiletin qyzmetterdi tutynýshylardyń joldanymdaryn tıimdi túrde qaraýdy qamtamasyz etý, qarjy ónimderi boıynsha týyndaıtyn daýlardy sotqa deıin retteý, sondaı-aq qaryz alýshy-jeke tulǵalardyń qarjylyq múmkindikterin eskere otyryp, olardyń bereshegin retteýge járdemdesý jónindegi mindetter tur, — dep atap ótti vedomstvo.
Protsesterdi tsıfrlandyrý, bereshekti, onyń ishinde Finkelisim.kz bereshekti ujymdyq retteý platformasyn paıdalana otyryp jeke jáne ujymdyq retteýdi damytý, sondaı-aq «Qaryzsyz qoǵam» jobasymen ózara is-qımyl jasaý qyzmettiń basym baǵyttary bolady.
Júıeli problemalardy jáne is-qımyldy qadaǵalaý sýbektileriniń qaıtalanatyn praktıkalaryn anyqtaý úshin kelip túsken jáne qaralǵan joldanymdardy taldaý, sondaı-aq qarjylyq qyzmetterdi tutynýshylardyń quqyqtaryn qorǵaý tetikterin jetildirý jóninde tıisti usynystar daıyndaý qyzmet jumysynyń mańyzdy baǵyty bolady.
Qarjylyq kórsetiletin qyzmetterdi tutynýshylardyń joldanymdaryn qaraý óteýsiz negizde júzege asyrylady.
Budan buryn Máýlen Áshimbaev halyqaralyq syılyqtyń qazylar alqasyna saılanǵanyn jazǵanbyz.
