Marııa Brovkova men Rýfına Iskakova Parıj Olımpıadasynyń shırek fınalynda óner kórsetedi
PARIJ. KAZINFORM – Frantsııa astanasy Parıj qalasynda ótip jatqan Olımpıada oıyndarynda kanoede 500 metrge eskek esýden irikteý saıysynda qazaqstandyq jup Marııa Brovkova men Rýfına Iskakova óz tobynda 5-orynǵa ıe boldy.
Otandastarymyz atalǵan qashyqtyqty 2:00.05 sekýnd ýaqyt kórsetkishimen eńserip, máre syzyǵyna besinshi bolyp jetti. Osylaısha elimizdiń áıelder quramasy shırek fınalda baq synaý múmkindigine ıe boldy.
Bul Marııa men Rýfına qatysyp jatqan birinshi Olımpıada. Ekeýi de lıtsenzııany Tokıodaǵy Azııa chempıonatynda jeńip alǵan bolatyn.
Esterińizge sala keteıik, Frantsııa astanasy Parıj qalasynda ótip jatqan XXXIII jazǵy Olımpıada oıyndary 11 tamyzda máresine jetedi. Olımpıadashylar 32 sport túrinen 329 medal jıyntyǵyn sarapqa salyp jatyr.
Qazir Qazaqstan quramasynyń qorjynynda 1 altyn, 1 kúmis, 2 qola medal bar.
