Marııa Brovkova Azııa oıyndarynyń qola júldegeri atandy

Qazaqstandyq, 18 jastaǵy Marııa Brovkova Qytaıdyń Hanjchoý qalasynda ótip jatqan Azııa oıyndarynda qola júldeger atandy, dep habarlaıdy QazAqparat tilshisi.

Marııa Brovkova bir adamdyq kanoeda 200 metr qashyqtyqta máre syzyǵyn úshinshi bolyp qıdy. Qytaı sportshysy chempıon atansa, taılandtyq eskekshi ekinshi keldi.

Bul – batysqazaqstandyq Marııa Brovkovanyń Azııa oıyndaryndaǵy ekinshi júldesi. Ol keshe Rýfına Iskakovamen birge 500 metr qashyqtyqta juptasyp kanoe esýde kúmis medal oljalaǵan bolatyn.

M.Brovkovanyń jeke bapkeri, anasy Elena Brovkovanyń aıtýynsha, bul Azııa oıyndarynda eskek esýden olımpıadaǵa joldama úlestirilmeıdi. Aldaǵy jyly kóktemde lıtsenzııalyq Azııa chempıonaty ótetin bolady.

Marııa Brovkova – baıdarka men kanoe esýden halyqaralyq dárejedegi sport sheberi. Jasóspirimder arasynda eki dúrkin álem chempıony, eresekter arasynda álem kýbogi kezeńiniń jeńimpazy. Qazirgi kezde M.Brovkova Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń 2 kýrsynda dene shynyqtyrý jáne sport mamandyǵy boıynsha oqıdy. Marııa bolashaqta anasy sekildi jattyqtyrýshy bolýdy kózdeıdi, onyń armany – ulttyq qurama qatarynda Parıj olımpıadasyna joldama alyp, tórtjyldyqtyń basty básekesinde júldege iliný.

Eske sala keteıik, budan buryn Qazaqstan qorjynyna tórtinshi altyn medal túskenin jazǵan bolatynbyz.