Marına Kýrnosova Azııa qurlyǵynyń eń myqty veloshabandozy atandy
ASTANA. QazAqparat - Velosport boıynsha qyzdar arasyndaǵy Azııa chempıonatynyń jeńimpazy Marına Kýrnosovany Nursultan Nazarbaev halyqaralyq áýejaıynan saltanatty túrde qarsy aldy, dep habarlaıdy Astana ákimdiginiń resmı saıty.
Esterińizge sala keteıik, velosporttan Azııa chempıonaty 8-12 aqpan aralyǵynda Neıpıdo (Mıanma) qalasynda ótti. Jarysqa 30-dan asa eldiń sportshylary qatysty.
Astanadaǵy mamandandyrylǵan balalar-jasóspirimder sport mektebiniń tárbıelenýshisi óziniń sporttyq karerasynda Azııa ıýnıor birinshiliginde altyn medaldi jeńip aldy.
Sportshynyń jeke jattyqtyrýshysy Vladımır Berezınniń aıtýynsha, Marına jarysqa úsh aı daıyndalǵan.
«Osy chempıonatqa biz úsh aı daıyndaldyq, aldymyzǵa tek qana birinshi oryn alamyz degen naqty maqsat qoıdyq. Marına - sırek kezdesetin talantty, eńbekqor jáne alǵyr qyz. Men oǵan sendim jáne ol úmitimizdi aqtady», - deıdi jattyqtyrýshy.
Onyń aıtýynsha, Astanadan jarysqa eki sportshy qatysty, olar Marına Kýrnosova men jastar arasynda úzdik bolǵan Danıl Pronskıı.
«Qazaqstan quramasy úsh medal jeńip aldy, eki altyn, bir qola. Bul biz úshin úlken maqtanysh», - deıdi Vladımır Berezın.
8 aqpandaǵy 11 km qashyqtyqtaǵy jeke jarysta qyzdar arasynda Azııa chempıonatynyń altynyn Marına Kýrnosova jeńip aldy, al 11 aqpan kúni 72 km toptyq jarystyń sońǵy sekýndynda ekinshi oryndy jiberip alyp, 3-orynǵa turaqtady.
«Klımat aýysqandyqtan kishkene qıyndaý boldy, onyń ústine barlyq kúshimdi osy jarysqa saldym. Bastysy ózimdi maqtan tuttym. Jarystyń tuǵyryna shyǵyp, Qazaqstannyń ánurany shyrqalǵan kezdegi sezimimdi sózben aıtyp jetkize almaımyn. Bul meniń shekaradan asyp shyqqandaǵy eń alǵashqy jeńisim», - deıdi Marına Kýrnosova.
Aıta keteıik, Marına Kýrnosova - QR sport sheberi, 2017 jyly jastar oıynynyń chempıony, 2016, 2017 jyldyń shosse men trekten QR chempıony, ótken jyly Azııa chempıonatynda sportshy 2-oryndy ıemdengen bolatyn.
