Marın Le Pen EO qarjysyn zańsyz paıdalandy degen kúdikke ilikti

ASTANA. KAZINFORM – Eýropalyq prokýratýra seısenbi kúni Frantsııadaǵy «Ulttyq birlestik» partııasynyń kóshbasshylary Marın Le Pen men Jordan Bardellaǵa, sondaı-aq Brıýsseldegi olardyń ońshyl odaqtastaryna qatysty tergeý bastalǵanyn málimdedi, dep habarlaıdy Kazinform agenttiginiń menshikti tilshisi.

— Eýropalyq prokýratýra tergeý bastady, — dedi organnyń ókili. Alaıda ázirge tergeý nátıjesine qaýip tóndirmeý úshin naqty aqparat taratylmaıdy. 

Bıyl shilde aıynyń basynda birqatar eýropalyq BAQ jarııalaǵan aıyptaýlarǵa sáıkes, atalǵan frantsýz partııasy men burynǵy Eýroparlament fraktsııasy — «Tulǵalyq jáne demokratııa» (ID) seriktesteri 2019 jyldan 2024 jylǵa deıingi aralyqta 4,3 mıllıon eýrodan astam qarajatty zańsyz jumsady dep kúdikke ilingen.

Óz kezeginde, «Ulttyq birlestik» partııasy bul jaǵdaıǵa jedel ún qatty.

— Men muny Eýroparlament ákimshiliginiń tarapynan jańa qýdalaý áreketi retinde qarastyramyn, — dedi partııa prezıdenti, Marın Le Penniń senimdi serigi Jordan Bardella baspasóz máslıhatynda.

Marın Le Penniń ózi bul aıyptaýlardy joqqa shyǵaryp, olardy «saıası astary bar» dep sıpattady.

Marın Le Pen men «Ulttyq birlestik» partııasyna qatysty aldyn ala tergeý 2023 jyly, Frantsııanyń Saılaý naýqandarynyń shyǵyndary men saıası qyzmetti qarjylandyrý jónindegi ulttyq komıssııasynyń suranysynan keıin bastalǵan bolatyn.

Frantsııanyń ońshyl saıasatkeri Marın Le Penniń aınalasyndaǵy jaǵdaı ýshyǵyp barady, sebebi ol 2027 jyly ótetin prezıdenttik saılaýda negizgi úmitkerlerdiń biri bolyp sanalady.

Bıyl sáýir aıynda Frantsııa soty Marın Le Pendi Eýropalyq odaq qarajatyn zańsyz paıdalanǵany úshin kináli dep tanyǵan.