Marıhýana men gashıshtiń iri partııasymen qylmystyq top ustaldy
ASTANA. QazAqparat - Jambyl oblysynda uıymdasqan qylmystyq toptan marıhýana men gashıshtiń iri partııasy tárkilendi, dep habarlaıdy QazAqparat Polisia.kz saıtyna silteme jasap.
«Jambyl oblystyq Polıtsııa departamenti Esirtki qylmysyna qarsy is-qımyl basqarmasynyń qyzmetkerleri ósimdik tektes esirtki quraldaryn (marıhýana, gashısh) daıyndaýmen, tasymaldaýmen jáne elimizdiń basqa óńirlerine ótkizýmen (bıylǵy mamyr aıynan bastap) aınalysyp kelgen Jambyl oblysy Shý aýdanynyń 5 turǵynynan turatyn qylmystyq topty quryqtady.
14 qazanda jedel-izdestirý is-sharalary barysynda uıymdasqan qylmystyq toptyń barlyq qatysýshylaryn bir mezgilde ustaý júzege asyryldy.
Tintý barysynda jalpy salmaǵy 100 keliden asatyn esirtki quraldarynyń (marıhýana jáne gashısh) iri partııasy, sondaı-aq Aqsý avtomaty, 5,45 mm kalıbrli 30-dan astam patron tárkilendi», - delingen habarlamada.
Uıymdasqan qylmystyq top múshelerine qatysty QR Qylmystyq kodeksiniń 297-baby 3-bóligimen (Esirtki quraldaryn, psıhotroptyq zattardy, olardyń analogtaryn ótkizý maqsatynda zańsyz daıyndaý, qaıta óńdeý, satyp alý, saqtaý, tasymaldaý, jóneltý ne ótkizý), QR QK 296-baby 4-bóligimen (Esirtki quraldarymen, psıhotroptyq zattarmen, olardyń analogtarymen zańsyz jumys isteý) jáne QR QK 287-babymen (Qarýdy, oq-dárilerdi, jarylǵysh zattar men jarylǵysh qurylǵylardy zańsyz satyp alý, berý, ótkizý, saqtaý, tasymaldaý nemese alyp júrý) sotqa deıingi tergeý amaldary júrgizilip jatyr.
Ustalǵandardyń barlyǵy QR Qylmystyq-protsessýaldyq kodekstiń 128-babyna sáıkes ýaqytsha ustaý ızolıatoryna qamaldy.
Foto: polisia.kz
