Márege 500 metr qalǵanda qamshy bastym – Alamanda top jarǵan tulpardyń shabandozy
ASTANA. KAZINFORM – Dúnıejúzilik kóshpendileri oıyndary aıasynda ótken alaman báıgede Ańsar Arystanbek tizgindegen Aıqabaq atty tulpar top jardy. Kazinform tilshisi shabandozben tildesti.
«Úlken báıgede birinshi bolyp kelgenime qýanyshtymyn. Men Almaty qalasy Týǵanbaı aýylynyń balasymyn. Atqa shabýdy ákem úıretti. 8 jasymnan bastap alaman báıgede shabandoz bolyp júrmin. Búgingi jarysta ózime, astymdaǵy tulparyma senimdi boldym. Sońǵy aınalymǵa deıin topta júrdim. Basty qarsylasym «Jumyrtuıaq», «Qara qyzdyń» sharshańqyrap kele jatqanyn baıqadym. 500 metr qalǵanda qamshy basyp, Aıqabaqtyń bar qarqynyn kórsettim», - deıdi shabandoz Ańsar Arystanbek.
Aıta keteıik, 25 shaqyrymdyq Alaman báıgege 27 shabandoz qatysty. Sońǵy aınalymda 7 at qana qaldy. Máre syzyǵyn birinshi bolyp «Aıqabaq» kesti. «Jumyrtuıaq» ekinshi bolyp kelse, qyrǵyzstandyq sáıgúlik – «Qara qyz» úshtikti túıindedi.
1-oryn: «Aıqabaq», shabandoz – Ańsar Arystanbek, bapkeri – Saparǵalı Satpaev, at ıesi – Jambyl Bóbekbaı (Qazaqstan);
2-oryn: «Jumyrtuıaq», shabandoz – Hamza Amankeldi, bapkeri – Marat Aqberlınov, at ıesi – Marlan Bektenov (Qazaqstan);
3-oryn: «Qara qyz», shabandoz – Elesov Nýrel, bapkeri – Kerımbekov Nýrbek, at ıesi – Syrǵaq ýýlý Izat (Qyrǵyzstan).
Rızabek
