Marat Tájın «Rýhanı jańǵyrý» baǵdarlamasy jónindegi ulttyq komıssııaǵa jetekshilik etedi
Memleket basshysy Qasym-Jomart Toqaevtyń Jarlyǵymen jańartylǵan Ulttyq komıssııa quramyna Qazaqstan Respýblıkasynyń Memlekettik hatshysy Marat Tájın jetekshilik etedi.
Komıssııa otyrysynda «Rýhanı jańǵyrý» baǵdarlamasy men Elbasynyń «Uly dalanyń jeti qyry» atty maqalasynyń iske asyrylý qorytyndylary, sonymen qatar jańa jobalardy júzege asyrý josparlary qaraldy.
Jıyndy ashqan Memlekettik hatshy Marat Tájın eki jyl ishinde qoǵamdyq jáne tarıhı sanany jańǵyrtýdy basty maqsat etken aýqymdy jumys atqarylǵanyn atap ótti.
Latyn grafıkasy negizindegi qazaq álipbıi bekitildi. «Týǵan jer» jobasy aıasynda metsenattar qarajatyna 27 mektep, 115 balabaqsha, 479 áleýmettik ınfraqurylym nysany salyndy. Otandyq tarıhta alǵash ret shet tilderden ekonomıka, áleýmettaný, saıasattaný, psıhologııa jáne ózge de ǵylym salalary boıynsha álemdegi 48 úzdik oqýlyq qazaq tiline aýdarylyp, basyp shyǵaryldy. Eldiń gýmanıtarlyq bilim qory 2019 jyly taǵy 30 kitappen tolyqpaq. Sondaı-aq BUU-nyń negizgi 6 (aǵylshyn, frantsýz, ıspan, arab, qytaı, orys) tilinde Qazaqstan jazýshylary men aqyndarynyń proza jáne poezııa antologııalary baspaǵa ázirlenip, osy jyly jaryq kóretin bolady. «Kıeli Qazaqstan» jobasy tabysty júrgizilýde: 28 tarıhı nysanda restavratsııa jasaldy, jańadan «Bozoq», «Botaı», «Saraıshyq» qoryq-mýzeıleri ashyldy. Elbasynyń «Uly dalanyń jeti qyry» maqalasyndaǵy jobalar qyzý iske asyrylýda.
Júrgizilip jatqan jumystyń naqty nátıjeleri men josparlary týraly otyrysta Qazaqstan Respýblıkasy Prezıdenti Ákimshiligi Memlekettik baqylaý jáne uıymdastyrý-aýmaqtyq jumysy bóliminiń meńgerýshisi Nurlan Saýranbaev, «Wikibilim» qoǵamdyq qory qamqorshylar keńesiniń tóraǵasy Raýan Kenjehanuly, Qazaqstan Respýblıkasy Prezıdenti Ákimshiligi Іshki saıasat bóliminiń meńgerýshisi Aıda Balaeva, Nur-Sultan qalasynyń ákimi Baqyt Sultanov, Mádenıet jáne sport mınıstri Arystanbek Muhamedıuly, Bilim jáne ǵylym mınıstri Kúlásh Shámshıdınova, Aqparat jáne qoǵamdyq damý mınıstri Dáýren Abaev sóz sóıledi.
Memlekettik hatshy Marat Tájın «Rýhanı jańǵyrý» baǵdarlamasyn ári qaraı iske asyrý jumysyn jandandyrý qajettigin aıryqsha atap aıtyp, birqatar tapsyrma berdi, olardyń oryndalýy Qazaqstan Respýblıkasy Prezıdenti Ákimshiliginiń tıisti bólimderi men Ulttyq komıssııanyń udaıy baqylaýynda bolmaq.
