Marat Syzdyqov TMD Baıqaýshylar mıssııasynyń basshysyn qabyldady

NUR-SULTAN. Qazaqparat - Qazaqstan Syrtqy ister mınıstriniń orynbasary Marat Syzdyqov TMD Atqarýshy komıteti tóraǵasynyń Birinshi orynbasary Vıktor Gýmınskııdi qabyldady, dep habarlaıdy QR SІM baspasóz qyzmeti.

Kezdesýdiń taqyryby 2021 jylǵy 10 qańtarǵa belgilengen QR Parlamenti Májilisiniń depýtattaryn saılaýǵa baılanysty Nur-Sultanda TMD Halyqaralyq baıqaýshylar mıssııasy shtabynyń ashylýy boldy.

Suhbat barysynda M. Syzdyqov TMD Atqarýshy komıtetiniń ókilin Májilis depýtattarynyń ashyq saılaýyn ótkizý Qazaqstannyń odan ári demokratııalyq damýy úshin mańyzdylyǵy týraly habardar etti. Bıyl elimizde kóppartııalylyq pen saıası básekelestikti damytýǵa, azamattyq belsendilikti arttyrýǵa baǵyttalǵan teńdessiz saıası reformalar paketi iske asyryldy.

Óz kezeginde V. Gýmınskıı baqylaýshylardyń jumysy úshin jaqsy jaǵdaı jasaǵany úshin rızashylyǵyn bildirdi. Suhbattasýshy TMD mıssııasy óz fýnktsııalaryn obektıvti jáne ashyq túrde oryndaýǵa daıyn ekenin aıtty.