Marat Sultanǵazıev memlekettik kiristegi negizgi kórsetkishti atady

NUR-SULTAN. QazAqparat - 2019 jyldyń qorytyndysy boıynsha salyq bereshegi 12 paıyzǵa qysqardy. Bul týraly búgin Ortalyq kommýnıkatsııalar qyzmetindegi baspasóz máslıhatynda QR QM Memlekettik kirister komıtetiniń tóraǵasy Marat Sultanǵazıev aıtty, dep habarlaıdy QazAqparat tilshisi.

«Negizgi kórsetkishterdiń biri - bereshekter men artyq tólemderdiń qysqarýy. Ákimshilendirýdi jaqsartý boıynsha qabyldanǵan sharalar sońǵy 4 jylda artyq tólemderdiń eń úlken kólemine - 2,3 trln teńgeden 2,1 trln teńgege deıin tómendetýge múmkindik berdi. 2019 jyldyń qorytyndysynda ol 157 mlrd teńgege nemese 2,1 trln teńgege deıin qysqardy. Qabyldanǵan sharalardyń esebinen salyq bereshegin 12 paıyzǵa nemese 28,3 mlrd teńgege tómendetý qamtamasyz etildi. Ol 2020 jyldyń 1 qańtarynda 204 mlrd teńgeni qurady», - dedi ol.

Komıtet basshysynyń aıtýynsha, qazirgi ýaqytta memlekettik satyp alýdyń ashyqtyǵyn arttyrý maqsatynda oǵan qatysýshylardan qarjylyq turaqtylyǵyn rastaý talap etiledi. Bul da 58 salyq tóleýshiniń bıýdjetke 1 mlrd teńgeden astam tólem jasaýyn qamtamasyz etip otyr.

«Buǵan qosa, ótken jyly iske qosylǵan táýekeli bar kompanııalardy anyqtaý jáne olarǵa erte satyda elektrondy shot-faktýralar jazyp berýdi shekteý boıynsha ilki joba júzege asyrylyp jatyr. Joba bastalǵannan beri 30 mlrd teńgeniń qosylǵan qun salyǵyn zańsyz esepke jatqyzýdyń joly kesildi. Munyń barlyǵy da salyq mádenıeti men tártibiniń artýyna yqpal etti. Salyqtyq monıtorıng nátıjesinde 36 paıyzǵa nemese 323 mlrd teńgege ósim qamtamasyz etildi», - dedi Marat Sultanǵazıev.