Marat Syzdyqov UQShU turaqty keńesiniń basshysy laýazymyna taǵaıyndaldy

Qazaqstannyń Ujymdyq qaýipsizdik týraly shart uıymynyń turaqty ókili Marat Syzdyqov UQShU Turaqty keńesiniń basshysy bolyp taǵaıyndaldy. Bul týraly UQShU Turaqty keńesiniń otyrysynda belgili boldy, dep habarlaıdy Kazinform uıymnyń resmı Telegram-kanalyna silteme jasap.

- Uıym tóraǵalyǵynyń Belarýs Respýblıkasynan Qazaqstan Respýblıkasyna ótýine baılanysty tóraǵalyqty Qazaqstannyń UQShU janyndaǵy turaqty ókili Marat Zenikenuly Syzdyqov qabyldady», - delingen habarlamada.

Marat Syzdyqov 1966 jyly 27 sáýirde Aqmola oblysy Şýchınsk qalasynda dúnıege kelgen.

Bilimi:

1984-1986 jyldary KSRO Qarýly Kúshterinde qyzmet etken;

1991 jyly S.Seıfýllın atyndaǵy Tselınograd memlekettik pedagogıkalyq ınstıtýtyn bitirgen;

2006 jyly Reseı SІM Dıplomatııalyq akademııasyn bitirgen.

Eńbek joly:

1991-1992 jyldary Tselınograd qalasyndaǵy №7 gımnazııada tarıh pániniń muǵalimi;

1992-1998 jyldary L.Gýmılev atyndaǵy Eýrazııa ulttyq ýnıversıtetiniń qazirgi zaman tarıhy kafedrasynyń oqytýshysy, aǵa oqytýshysy;

1998-2000 jyldary QR Prezıdenti Ákimshiliginiń Taldaý jáne strategııalyq zertteýler ortalyǵynyń sarapshysy;

2000-2002 jyldary QR Prezıdenti Ákimshiligi Qaýipsizdik Keńesiniń Taldaý ortalyǵynyń halyqaralyq úderisterdi taldaý jáne boljaý sektorynyń meńgerýshisi;

2002-2010 jyldary QR Reseı Federatsııasyndaǵy Elshiliginiń ekinshi hatshysy, birinshi hatshysy, keńesshisi;

2010-2014 jyldary QR Prezıdenti Ákimshiliginiń Syrtqy saıasat ortalyǵy meńgerýshisiniń orynbasary;

2014-2019 jyldary QR Reseı Federatsııasyndaǵy Elshiliginde keńesshi;

2019 jyldan bastap QR Syrtqy ister mınıstriniń orynbasary bolyp jumys istedi;

2022 jyldyń 21 sáýirinde Qazaqstan Respýblıkasynyń Ujymdyq qaýipsizdik týraly sharty uıymyndaǵy turaqty ókili bolyp taǵaıyndaldy.