Marat Shoranov qazaqstandyq vaktsına saldyrmaq

NUR-SULTAN. QazAqparat – QR Densaýlyq saqtaý birinshi vıtse-mınıstri Marat Shoranov «Koronavırýsqa qarsy vaktsınany ózderińiz saldyrýǵa daıynsyzdar ma?» degen suraqqa jaýap berdi, dep habarlaıdy QazAqparat tilshisi.

«Biz mınıstrden bastap, mınıstrlik basshylyǵy óz erkimizben ekpe saldyrýǵa baramyz. Qazirgi kezde bizdiń bas sanıtarlyq dárigerimiz Erlan Qııasov myrza jáne Densaýlyq saqtaý vıtse-mınıstri Ajar Ǵınııat hanym búgin Sputnik V vaktsınasyn saldyrýǵa daıyn. Jeke ózim qazaqstandyq vaktsınany tańdap otyrmyn. Bul vaktsına qoljetimdi bolǵan sátte, alǵashqylardyń biri bolyp osy ekpeni alamyn», - dep jaýap berdi Marat Shoranov Ortalyq kommýnıkatsııalar qyzmetinde ótken baspasóz máslıhatynda.

Buǵan deıin vıtse-mınıstr koronavırýs ınfektsııasyna qarsy vaktsınanyń qandaı jaǵdaıda salynbaıtynyn aıtqan edi.

Vaktsınalaý týraly tolyq aqparatty agenttiktiń arnaıy aıdarynan oqýǵa bolady.