Marat Shoranov Almatydaǵy medıtsınalyq mekemelerdiń jumysymen tanysty
Alǵashqy kúni ol medıtsınalyq nysandardyń qyzmetimen, «SK-Farmatsııa» JShS qoımalarynda qajetti dárilik preparattardyń bolýyn jáne jalpy óńirdiń koronavırýs ınfektsııasynyń ekinshi tolqynyna daıyndyǵymen tanysty, dep habarlaıdy QazAqparat QR Densaýlyq saqtaý mınıstrliginiń baspasóz qyzmetine silteme jasap.
Qoǵamdyq densaýlyq saqtaý basqarmasynyń bazasynda M.Shoranov medıtsınalyq uıymdardyń basshylyǵymen koronavırýs ınfektsııasynyń ekinshi tolqynyna daıyndyq boıynsha selektorlyq rejımde keńes ótkizdi.
Medıtsınalyq qoǵamdastyq ókilderi Almatydaǵy medıtsınalyq mekemelerdiń jumys isteý máselelerin jáne negizgi problemalardy talqylady.
Sondaı-aq, birinshi vıtse-mınıstr qalalyq balalar klınıkalyq juqpaly aýrýlar aýrýhanasynyń modýldik klınıkasynyń qyzmetimen tanysyp, qurylǵan «SK-Farmatsııa» JShS habynda boldy.
«Densaýlyq saqtaý mınıstrliginiń boljamyna sáıkes, respýblıkanyń tórt qalasynda – Nur-sultan, Almaty, Aqtóbe jáne Shymkentte biryńǵaı dıstrıbıýtor habtary quryldy, onda medıtsınalyq uıymdardyń ótinimderinen tys dárilik preparattar men jeke qorǵaný quraldarynyń qory qalyptastyryldy. Ol belgili bir aımaqta naqty pozıtsııalar boıynsha aýrýdyń órshýi jaǵdaıynda qoldanylady. Dárilik preparattar men jeke qorǵaný quraldary qoldanylǵan jaǵdaıda, paıdalanylǵan kólem jedel tolyqtyrylýy tıis», - dep atap ótti M.Shoranov.
Birinshi vıtse-mınıstr «AbdiIbrahimGlobalPharm» JShS zaýytynda bolyp, dárilik zattar óndirisiniń tolyq tizbegimen tanysty.
Іssapardyń birinshi kúniniń qorytyndysy boıynsha medıtsınalyq uıymdardyń qyzmetine baǵa berilip, Almaty qalasynyń Densaýlyq saqtaý júıesin odan ári tıimdi damytý jóninde tapsyrmalar berildi