Marat Shıbutov: Qazaqstanda qaıta óńdeýge jaramdy 56 mlrd tonna metallýrgııa qaldyǵy bar

QYZYLORDA. KAZINFORM – Ulttyq quryltaı múshesi Marat Shıbutov sovet zamanynda shala ıgerilip ketken kenishter men úıindilerdi qaıta óńdeýge ruqsat beretin zań normasyn qabyldaýdy usyndy.

- Bizde taý-ken metallýrgııasy kóptegen jyldar boıy jumys istep keledi. Osy ýaqytta kóp mólsherde qaldyq qordalandy. Arshylǵan kúıi jatqan taý jynystary, baıytý qaldyqtary, ıesiz kenishter jáne t.b. tolyp jatyr. Biraq ol qaldyqtar paıda bolǵan kezdiń múmkindikteri shekteýli bolatyn. Qazir basqa zaman, tehnologııa ózgerdi. Buryn qaldyq dep eseptelgen zattar qazir qalypty ári jaqsy shıkizat bolyp sanalady. Bizdiń elde ondaı qaldyqtar óte kóp. Shamamen 1600-1700 nysan bolsa, jıyntyǵy 56 mıllıard tonna ken degen sóz. Onyń ishinde 8 mıllıard tonna ken baıytý qaldyqtary ıesiz jatyr, - dedi Marat Shıbutov.

Aıtýynsha, qazir munyń bárin kádege jaratýǵa bolady.

- Bárinen metall balqyta alamyz. Eń áýeli túrli-tústi jáne baǵaly metaldar balqytýǵa bolady. Munsha resýrs nege paıdalanylmaı jatyr? Óıtkeni olardyń 67,7 paıyzy jeke menshiktiń de, memlekettiń de ıeliginde emes. Iesi belgisiz. Ónerkásip jáne qurylys mınıstrligi shuǵyl túrde osy qorlardy túgendep, paıdalanýǵa múmkindik beretin zańnamalyq bazany ázirleýi kerek. Bul jumys istep turǵan óndiristerdi damytýǵa qýatty serpin beredi. Al mono qalalardaǵy ıesiz úıindiler men ken baıytý qaldyqtarynan, kem degende, qurylys materıaldaryn óndirýge bolady, - dedi Ulttyq quryltaı múshesi.

Aıta keteıik, Kazinform Memleket basshysynyń Ulttyq quryltaıdaǵy sózin translıatsııalaıdy.