Marat Shıbutov: Aýyl ákimine úmitkerlerge qoıylatyn talaptardy jeńildetýdi usynamyn
Marat Shıbutov Májilis qaraýynda jatqan zań jobasy negizinen durys ekenin aıtady. Degenmen, ákim bolýdan úmitkerlerge qoıylyp otyrǵan talapty sál jeńildetý qajet dep esepteıdi.
«Men bylaı aıtar edim. Qazir usynylyp otyrǵan protsedýra negizinen durys. Ásirese, qazirgi saılaýlardyń arnasynda jáne taǵy basqa faktorlarǵa baılanysty bul durys dep oılaımyn. Meniń kózime shalynyp turǵan jalǵyz túıtkil ákimdikten úmitkerlerge qoıylyp otyrǵan talaptarǵa qatysty. Qazir usynylyp otyrǵan nusqa boıynsha úmitkerlerge eńbek ótili men joǵary bilimniń bolýyn mindettep otyr. Keıbir aýyldarda, ásirese, shalǵaıdaǵy shaǵyndaý aýyldarda qazirgi ákimnen basqa joǵary bilimdi úmitker shyǵa qoımaýy múmkin. Aýylda qalǵan joǵary bilimdi adamdar muǵalimder men mektep dırektorlary ǵana deýge bolatyn shyǵar. Al olarǵa ákim bolý asa qajet emes. Onsyz da ózine jetetin jumysy bar. Men bilimge qatysty talapty orta-arnaıy bilim dep jeńildetýdi usynar edim», - deıdi sarapshy.
Ol, sondaı-aq, eńbek ótilin qazirgi talap boıynsha qaldyrsa, tek tis qaqqan memlekettik qyzmetshiler ǵana úmitker retinde tirkele alatyndyǵyn aıtty.
«Eńbek ótiline qoıylatyn talapty da qysqartýdy usynar edim. Al qazirgi talap boıynsha tek memlekettik qyzmetshiler ǵana úmitker bolatyn túri bar. Eńbek ótilindegi qazirgi talap básekeni aıtarlyqtaı tómendetedi dep oılaımyn. Jalǵyz nazarym aýǵany – osy tus. Qalǵan normalardyń bári durys dep oılaımyn», - deıdi saıasattanýshy.
Marat Shıbutovtan jalpy aýyl men kent ákmiderin saılaý ondaǵy tirshilikke qalaı áser etýi múmkin ekenin de surap kórdik.
«Birinshi saılaýdan bastap aýyldar men kentterdegi ahýal ózgerip sala beredi deýden aýlaqpyn. Birinshi lekte qazir qyzmette júrgen ákimderdiń 90 paıyzy ornyn saqtap qalýy múmkin. Sonda da bul - jańa múmkindik. Odan keıingi lekte jańarý bolady. Úmitkerlerdiń sany artyp, aýyldar saılaýǵa belsendi aralasa bastaıdy dep topshylap otyrmyn», - degen sarapshy saılaý men jershildik, rýshyldyq máselesi týraly oıyn ortaǵa saldy.
«Saılaý aýyldaǵy aǵaıyndy rýǵa, júzge bólip jiberýi múmkin degendi aıtyp júrmiz. Olaı bolýy da múmkin. Biraq shegirtkeden qorqyp, egin ekpeı otyra berýge bolmaıdy ǵoı. Alǵa jyljıǵymyz kelgen eken, budan da ótýimiz kerek. Adamdar «ózimizdikiler» úshin emes, jaqsy ómir úshin daýys berip úırenýi kerek. Jaraıdy, bir ret qanǵa tartyp, qateleser. Biraq halyq kóz aldyndaǵyny kórmeıtin nadan deý durys emes. Birinshi ret qateleser. Ekinshi ret «ózmizdiki» dep daýys berýdiń qanshalyqty durys emes ekenin kóredi. Sondyqtan, bul máseleni rýshyldyqqa ákep tireı berýdiń qajeti joq. Sonshalyq problema bolady dep oılamaımyn», - dep túıindedi Marat Shıbutov.
Anyqtama: Marat Shıbutov, QR Prezıdenti janyndaǵy «Áskerı-strategııalyq zertteýler ortalyǵy» AQ-nyń jetekshi sarapshysy, Transparensı Qazaqstan» qoǵamdyq qorynyń qamqorshylyq keńesiniń tóraǵasy.
