Marat Shıbutov: Ata Zań jobasy referendýmǵa shyǵarýǵa daıyn

ASTANA. KAZINFORM — Saıasattanýshy Marat Shıbutov Konstıtýtsııalyq reforma jónindegi komıssııanyń otyrysynda Qazaqstandaǵy jańa Ata Zań jobasynyń búkilhalyqtyq referendýmǵa shyǵarýǵa tolyq daıyn ekenin atap ótti.

Marat Shıbutov bolashaq birpalataly Parlament – Quryltaıdy taratý múmkindigine qatysty konstıtýtsııalyq normany egjeı-tegjeıli tujyrymdaýdy usyndy. Onyń aıtýynsha, Quryltaı tek zań shyǵarý organy ǵana emes, sonymen qatar joǵary laýazymdy tulǵalardy taǵaıyndaýdy kelisýge quqyly. Bul tizimge Vıtse-Prezıdent, Premer-Mınıstr, Konstıtýtsııalyq Sottyń 10 sýdıasy, Ortalyq saılaý komıssııasynyń 6 múshesi jáne Joǵary aýdıtorlyq palatanyń 8 múshesi kiredi. ıAǵnı, qazirgi júıege qaraǵanda bul quqyqtar aıtarlyqtaı keńeıtilgen.

— «Taratady» degen sóz saıası júıede qatal úderisti bildiredi, bul depýtattar men basqa organdar úshin qysymdy arttyrýy múmkin. Sol sebepti men ony alyp tastap, kelisimge kelý múmkindigin qaldyrý úshin «taratýǵa quqyly» degen tujyrymdy qoldanýdy usynamyn. Bul usynys «Prezıdent» bólimindegi 46-baptyń 2, 4, 8-tarmaqtaryna jáne «Quryltaı» bólimindegi 62-baptyń 1, 2-tarmaqtaryna qatysty. Osylaısha, saıası júıe ıkemdi ári ymyraǵa kelýge beıimdeledi, — dedi saıasattanýshy.

Sonymen qatar, Marat Shıbutov jańa Konstıtýtsııaǵa engizilgen árbir tujyrym Konstıtýtsııalyq komıssııada jan-jaqty talqylaýdan ótkenin, ashyq qoǵamdyq baǵalaýmen súıemeldengenin atap ótti. Ol bul úderistiń kúrdeli, keıde yńǵaısyz bolǵanymen, adal ári ádil túrde júzege asqanyn jetkizdi.

— Nátıjesinde qazirgi kezeńde bizde túrli sala sarapshylarynyń birlesken eńbegi, ártúrli kózqaras, tájirıbe men dúnıetanym nátıjesinde jasalǵan joba bar. Sondyqtan da, meniń oıymsha, Ata Zań jobasy jalpyhalyqtyq daýys berýge tolyq daıyn, — dep qorytyndylady Marat Shıbutov.

Aıta keteıik, Konstıtýtsııalyq reforma jónindegi komıssııanyń IX otyrysy 7 aqpan kúni ótti. Onda Memlekettik keńesshi Erlan Qarın nelikten jańa Konstıtýtsııa qabyldaý qajet ekenin túsindirdi.