Marat Omarov: Elektromobılmen júrý eki ese paıdaly

ASTANA. QazAqparat - Tehnologııalyq damý jónindegi ulttyq agenttikte ótken jyly grant usyný erejeleri ózgergen bolatyn. Jańa talaptar boıynsha 208 adamnyń usynysy ótip, olardyń 13-ne 2,4 mlrd teńgeniń granty berilgen. Bıyl bolatyn Agenttiktegi ózgerister men transfert tehnologııalar júıesiniń damýy men bıznes-ınkýbatorlardy sýbsıdııalaý jumystary jóninde agenttik tóraǵasy Marat Omarov aıtyp berdi.

Ótken jyly Agenttik basshylyǵyna keldińiz, aldyńyzǵa qandaı maqsattar qoıdyńyz?

Ekonomıkalyq turǵydan alǵanda aldymen barlyq tásilderdi durys tarazylaý kerek. Búgingi naryqqa ne kerek, agenttik ne isteý kerek jáne tıimdi qoldaýdy qalaı júzege asyrý kerek. Men osyndaı maqsatpen keldim.

- Grantqa ótinish berýshilerge qoıylatyn talapty nelikten kúsheıttińiz?

- Baıqaǵanymyz, qanshalyqty az grant alsa, ekonomıkalyq tıimdiligi sonshalyqty kóp. Negizgi talaptar agenttik pen ótinish berýshi arasynda tehnologııa qunynyń  birlese qarjylandyrýdaǵy tepe-teńdikti qaıta qaraýǵa qatysty bolmaq. Bul kórsetkish buryn 80 de 20 paıyz deńgeıinde  bolyp, shyǵynnyń aýqymdy bóligin agenttik ótep kelgen. Budan bylaı kórsetkish - 50 de 50 paıyz bolmaq.  Jıyntyq tabys úsh jyldyń ishinde jobanyń qunyn jabýy kerek. Adam óz qaltasynan shyǵatyn qarjysymen táýekel etip, jobanyń jarty qunyn ózi salsa, budan alǵa ilgerileýshilik baıqalady, demek, sapa da joǵary. Joba ıesi 80 paıyz grant alǵan kezde, ol eshqandaı qaterge bas tikpeıdi. Sol úshin biz táýekeldi teń bólip, joba qunynyń bir bóligin ótinish berýshiniń ózine qaldyramyz.

-Atqarylyp jatqan jumystarǵa qaramastan agenttik tarapyna kóptegen syndar aıtylyp jatady. Bul nelikten?

-Menińshe, bul ınnovatsııalardan halyqtyń úlken úmit kútýinen. Salynǵan qarajatqa sáıkes adamdar Qazaqstanda jańa Google, Amazon nemese Facebook paıda bolsa deıdi. Menińshe bul ádiletsiz. Kópshilik jyldam nátıje kórgisi keledi. Jalǵyz agenttiktiń nemese jalǵyz kompanııanyń mundaı aýqymdaǵy jumys kólemin ıgerýge shamasy jetpeıdi. Bul jerde kóptegen faktorlar bar. Ár ınstıtýt, nemese buǵan qatysy bar barlyq uıymdar birigip kúsh salýy kerek. Bul - bilim, qarjy salalaryna, jekemenshik sektor, úkimet jáne basqa da salalarǵa qatysy bar suraq. Bári birikse nátıje shyǵýy múmkin.

Agenttikte jekeshelendirý jumystary josparlanǵan ba?

- Iá, Tehnologııalyq damý jónindegi ulttyq agenttik 100 paıyz «Báıterek» holdınginiń enshilesi uıymy bolyp tabylady. Agenttiktiń ózi tehnoparkter men konstrýktorlyq bıýrolardan bastap jekeshelendirý tiziminde tur. Qazir strategııalyq keńesshilerdi tańdap alý jumystary júrip jatyr. Jyldyń aıaǵyna deıin biz agenttikke strategııalyq seriktester taýyp, jumysymyzdy jandandyramyz dep oılaımyn.

Menshik ıesi kim bolýy múmkin?

- Aldymen agenttikti satý aldyndaǵy daıyndyq jumystaryn júrgizemiz. Bolashaqtaǵy ınvestor týraly kelisimder odan keıin qolǵa alynady.

-Elektromobılderge kóshý týraly bastamańyz jóninde aıtyp berińizshi, bizdiń qysqa ol jaraı ma?

- Men ol sheshimdi baıaǵyda qabyldaǵam. Qazir jumysqa, jınalystarǵa op-ońaı baryp júrmin. Qýaty jetip tur. Bári aıazda qatyp qalady dep oılaıdy, qatqan joqpyz, júrip júrmiz. Kerisinshe kólikti qyzdyrýǵa ýaqyt ketpeıdi. Batareı tez jylynady. Benzın tapshylyǵyn sezingen joqpyn. Elekromobılmen júrý eki - ese paıdaly.

- Áńgimeńizge rahmet