Marat Omarov «Anashym» ánin nege qaıtarǵanyn aıtty

ASTANA. KAZINFORM – Belgili ánshi, QR eńbek sińirgen qaıratkeri Nurlan Ónerbaev 37 jyl aıtqan «Anashym» ánin endi oryndamaıdy. Munyń sebebin ánniń avtory, kompozıtor, Qazaqstannyń eńbek sińirgen artısi Marat Omarov túsindirdi.

– Nurlan ándi halyqqa jetkizdi, barıtondyq tembrimen erekshe etti. Biraq jyldar óte halyq ony Ónerbaevtiki dep qabyldap ketti. Tipti, karaokelerde de Nurlan Ónerbaevtyń aty jazylady, al avtorlar jaıly bir málimet joq. Muny maǵan jurtshylyq ta jıi aıtty. Jaqynda ánniń sózin jazýǵa atsalysqan marqum Qaırat Jumaǵalıevtiń qyzy habarlasty. Ákesiniń esimi atalmaıtynyna ol da qapaly, – dedi kompozıtor Jibek Joly telearnasynyń «Búgin LIVE» baǵdarlamasynda.

Marat Omarov bireýdiń qorjynyna qol salmaý qajettigin jetkizdi.

– Kezinde belgili sazger Keńes Dúısekeev, Shómishbaı Sarıev te «Nurlan ándi tanytady, keremet jetkizedi, biraq onyń avtorlaryn tanytýǵa esh áreket jasamaıdy» dep aıtatyn. Óner juldyzy Erjan Belǵozıev te «Baýyrdy saǵyný» degen ánimdi aıtady, biraq avtory jaıly qozǵamaıdy» dep renishin bildirdi, – deıdi ol.

Sonymen qatar Marat Omarov avtorlyq quqyq máselesine toqtaldy.

– Qazir bul kúrdeli másele. Avtorlyq quqyq saqtalýy tıis. Jazbasha kelisimshart bolmasa, daý bitpeıdi. Al oryndaýshy avtordy syılap, bárin ashyq aıtsa, ándi eshkim qyzǵanbaıdy. Aıta bersin, – dep túıindedi oıyn kompozıtor.

Eske salaıyq, buǵan deıin Májiliste avtorlyq quqyq máseleleri boıynsha zańnamaǵa engiziletin túzetýler talqylandy.