Marat Moldashev BQO tabıǵı resýstar jáne tabıǵat paıdalanýdy retteý basqarmasyna basshy boldy
ORAL. KAZINFORM – QR Memlekettik qyzmet isteri agenttiginiń kelisimi boıynsha oblys ákiminiń ókimimen Marat Tóleǵalıuly Moldashev BQO tabıǵı resýrstar jáne tabıǵat paıdalanýdy retteý basqarmasynyń basshysy laýazymyna taǵaıyndaldy.
BQO ákimdiginen alynǵan málimetke qaraǵanda, Marat Tóleǵalıuly 1964 jyly dúnıege kelgen.
Bilimi joǵary. QR ІІM Qaraǵandy joǵary mektebin quqyqtaný mamandyǵy boıynsha bitirgen.
Ár jyldary QR ІІM BQO ІІD organdarynda, BQO boıynsha salyq ınspektsııasynyń zań keńesshisi, BQO boıynsha salyq komıteti quqyqtyq qamtamasyz etý basqarmasy zań bóliminiń bastyǵy, BQO kommýnaldyq menshik basqarmasy jekeshelendirý bóliminiń bastyǵy, BQO aýrýhanasy ákimshilik-basqarý personalynyń zańgeri, “Ýralsktehservıs” JShS dırektorynyń orynbasary qyzmetin atqardy.
Sondaı-aq Zelenov aýdany kásipkerlik bóliminiń bastyǵy, Zelenov aýdany kásipkerlik jáne aýyl sharýashylyǵy bólimi basshysynyń orynbasary, Aqjaıyq aýdany sáýlet, qala qurylysy jáne qurylys bóliminiń basshysy, Oral qalasy qurylys bóliminiń basshysy boldy,
Oǵan qosa Bórli men Tasqala aýdany turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysy, taǵaıyndaýǵa deıin “Ýralvodproekt” JShS dırektorynyń óndiris jónindegi orynbasary qyzmetin atqardy.
