Marat Qojaev qozǵaltqyshty uzaq qyzdyrǵandardy jazalaý normasyn synaǵandarǵa jaýap berdi
ASTANA. KAZINFORM — Senator Marat Qojaev kólik qozǵaltqyshty uzaq qyzdyrǵany úshin jazalaý normasyn qaıta qaraý kerek dep usynǵandarǵa jaýap berdi.
— Qazir turǵyn úı aýlasynda avtokóliktiń qozǵaltqyshyn 5 mınýttan artyq qyzdyryp turǵandarǵa aıyppul salýdy synǵa alyp, túrli blogerler «shtrafstan» dep aıtyp jatyr. Máselen, bir turǵyn úıde myńdaǵan adam turyp jatsa, ol jerde tártip bolýy kerek qoı?! Bekitilgen erejelerdi oryndaýy tıis. Bizdiń zańnama damyǵan elderdiń zańdarynan kem emes. Naqty joǵaryda atalǵan norma 20 jyl buryn qabyldanǵan, — dedi M. Qojaev Senattyń jalpy otyrysynan keıin tilshiler suraǵyna jaýap bere otyryp.
Sonymen qatar ol taıaýda qozǵaltqyshty uzaq qyzdyrǵany úshin jazalaý normasyn qaıta qaraý kerek ekenin usynǵan Májilis depýtatyna jaýap berdi.
— Ár depýtat nemese qoǵamdaǵy ár adam túrli pikirdi aıta beredi. Biraq zań men tártip qaǵıdatyn damytý úshin bárimiz tártipti bolýymyz kerek. Tek ózińdi ǵana oılamaı, kórshiler men basqa da adamdarǵa zııan keltirmeý jaǵyna da nazar aýdarǵan jón. Bul norma ne úshin qabyldandy? Turǵyn úı kesheniniń aýlasynda kóliktiń tútinin býdaqtatyp qoısaq, janǵan otynnyń zııandy zattary aýaǵa taraıdy. Qozǵaltqyshy uzaq qosylyp turǵan avtokóliktiń dybysy balalardyń uıyqtaýyna da kedergi bolyp jatady. Sondyqtan adamdardyń mazasyn almaý úshin osyndaı talaptar qarastyryldy. Osy máseleler zańmen rettelip turýy kerek, — dedi senator.
Aıta keteıik, osy norma aıasynda aıyppul 5 AEK somasynda qarastyrylǵan. Al osy talapty qaıtadan buzǵandarǵa 10 AEK aıyppul salynady.
Onyń paıymynsha, kólik qozǵalys kezinde tezirek jylynady.
— Jalpy, osynyń bári ekologııa úshin mańyzdy. Zamanaýı kólik maılary uzaq qyzdyrýdy qajet etpeıdi. Sondyqtan senator retinde bul normany qaıta qarastyrýdy qoldamaımyn. Joldaǵy keptelis kezinde keıbir jańa kólikterdiń qozǵaltqyshy avtomatty túrde óshedi. Árıne, elimizde eski kólikter barshylyq. Biraq ýaqyt óte kele jańa kólikterdiń úlesi arta túsedi, — dedi Marat Qojaev.
Jaqynda Májilis depýtat Serik Erýbaev qatty aıazdy kúnderi avtokólikti jylytýǵa 5 mınýttan kóp ýaqyt ketetinin aıtty. Osy oraıda ol kóliktiń qozǵaltqyshyn uzaq qyzdyrǵany úshin aıyppul salý normasy qısynsyz ekenin atap ótti.
Eske salsaq, 2024 jylǵy qazan aıyna deıin Marat Qojaev Іshki ister mınıstriniń birinshi orynbasary laýazymyn atqaryp keldi. Prezıdent Jarlyǵymen Marat Qojaev Qazaqstan Parlamenti Senatynyń depýtaty bolyp taǵaıyndaldy.