Marat Qoǵamov: Qoǵamdyq baqylaýdyń naqty shet-shegin aıqyndap alý kerek

NUR-SULTAN. QazAqparat – Іshki ister mınıstrligi qoǵamdyq keńesiniń tóraǵasy Marat Qoǵamov tyń zań jobasyn ázirleý kezinde qoǵamdyq baqylaýdyń shet-shegin aıqyndap alý kerektigin málim etti, dep habarlaıdy QazAqparat tilshisi.

«Qoǵamdyq baqylaý máseleleri boıynsha elementteri bar zańnamalyq aktilerdi zertteı otyryp, olardyń ártúrli sıpaty baryna kózim jetip otyr. Men halyqaralyq tájirıbeni, onyń ishinde Reseı Federatsııasynyń zańnamasyn jiti zerttedim. Sýbektter men obektilerdi, qoǵamdyq baqylaý formalaryn aıqyndaý – óte mańyzdy máselelerdiń biri dep aıtar edim. Jýrnalıstik zertteý máselelerine jeke toqtalý kerek. Memlekettik organdarǵa qoǵamdyq baqylaý sýbektilerinen basyn ala qashýǵa múmkindik bermeıtin sharalardy zań aıasynda qarastyrý qajet», - dedi Marat Qoǵamov «Qoǵamdyq baqylaý: memlekettik organdarmen ózara is-qımyl tetikteri jáne zańnamalyq bekitý» taqyrybynda ótken onlaın dóńgelek ústelde.

Onyń aıtýynsha tyń zań jobasyn ázirleý kezinde qoǵamdyq baqylaýdyń shet-shegin naqty bekitip alý kerek.

Aıta ketsek Aqparat jáne qoǵamdyq damý mınıstri Aıda Balaevanyń tóraǵalyǵymen Prezıdent Joldaýyn talqylaý boıynsha «Qoǵamdyq baqylaý: memlekettik organdarmen ózara is-qımyl tetikteri jáne zańnamalyq bekitý» taqyrybynda onlaın dóńgelek ústel ótti. Dóńgelek ústel jumysyna úkimettik emes uıymdardyń ókilderi, sarapshylar, ortalyq jáne jergilikti deńgeıdegi qoǵamdyq keńesterdiń músheleri jáne múddeli memlekettik organdardyń qyzmetkerleri qatysty.