Marat Qarabaev Lıtva men Latvııa shekarasyndaǵy kólik keptelisine qatysty túsinikteme berdi

Kólik mınıstri Marat Qarabaev Lıtva men Latvııa shekarasynda kólik keptelisi oqıǵasyna qatysty túsinikteme berdi. Buǵan deıin qazaqstandyq júk tasymaldaýshylar kezekte 7-8 kún turýǵa májbúr bolǵanyn aıtyp shaǵymdanǵan bolatyn, dep habarlaıdy Kazinform agenttiginiń tilshisi.

«Bul qabyldaýshy taraptyń qosymsha talaptary edi. Másele tek qazaqstandyq kólikterge qatysty emes. Belarýs aýmaǵynan shyǵatyn barlyq avtomobılderge qatysty. Onda eýropalyq jáne reseılik kólikter bar. Qabyldaýshy tarap tekserýge úlgermeı jatyr», - dep túsindirdi mınıstr.

Marat Qarabaev jetekshilik etetin vıtse-mınıstrmen jáne Elshilik qyzmetkerlerimen sóıleskenin habarlady. Onyń aıtýynsha, qazir kezek qozǵalyp jatyr.

«Jelide shekarada 3,5 myń qazaqstandyq kólik turǵany habarlandy, biraq bul barlyq elderden kelgen kólikterdiń jalpy sany. Bul qabyldaýshy tarap úshin protsedýralar boıynsha qosymsha ýaqytty qajet etedi. Áriptesterimiz shekarada 300 qazaqstandyq kólik týraly habarlady», - dep qosty Marat Qarabaev.

Buǵan deıin qazaqstandyq júk tasymaldaýshylar Belarýs, Latvııa jáne Lıtvanyń shekarasyndaǵy kezekke shaǵymdanǵan bolatyn. Keıin QR Syrtqy ister mınıstrliginiń resmı ókili Aıbek Smadııarov otandastarymyzǵa kómek kórsetý úshin qandaı sharalar qabyldanatyny týraly aıtty.