Marat Qarabaev: Qazaqstan sońǵy alty aıda shetelge 5 myń kólik eksporttady

NUR-SULTAN. QazAqparat – 2021 jyldyń qańtar-shilde aralyǵynda elimizde 320 mlrd teńgeniń 47 myńnan astam avtomobıli shyǵaryldy. Jáne Reseı, Belarýs, Ózbekstan jáne Qyrǵyzstanǵa 5 myńǵa jýyq jeńil avtomobıl eksporttaldy. Bul týraly Qazaqstan mashına jasaýshylarynyń ІH forýmynda QR Indýstrııa jáne ınfraqurylymdyq damý vıtse-mınıstri Marat Qarabaev aıtty, dep habarlaıdy QazAqparat tilshisi.

«Mashına jasaý salalary arasynda eń joǵary ósý dınamıkasyn avtomobıl jasaý kórsetedi. Indýstrııalandyrý jyldarynda alǵash ret qazaqstandyq avtoónerkásiptiń ónimderi eksporttyq naryqtarǵa shyqty, al el ishinde satylǵan árbir ekinshi jańa jeńil avtomobıl otandyq óndiris bolyp tabylady. 2021 jylǵy qańtar-shildede jalpy somasy 320 mlrd teńgege 47 myńnan astam avtomobıl óndirilip, ósim 27%-dy qurady. Osy kezeńde Reseı, Belarýs, Ózbekstan jáne Qyrǵyzstanǵa 5 myńǵa jýyq jeńil avtomobıl eksporttaldy», - deıdi Marat Qarabaev.

Vıtse-mınıstr Qazaqstanda kólik quraldary men aýyl sharýashylyǵy tehnıkasynyń komponentterin óndirý jolǵa qoıylyp kele jatqanyn atady.

«Mysaly, dıskiler, akkýmýlıatorlar, plastıkalyq bólshekter, destelegishter, shómishter, búıir qalqandary, sý jáne maı sorǵylary, qozǵaltqysh ramalary, maılar, súzgiler ózimizde shyǵarylady», - dedi mınıstrdiń orynbasary.