Marat Eslıamov «Ertis» fýtbol klýbynyń tizginin ustady
ASTANA. KAZINFORM — Qazaqstandyq 48 jastaǵy maman Marat Eslıamov «Ertis» fýtbol klýbynyń bas bapkeri bolyp taǵaıyndaldy.
Marat Joldasuly kásibı fýtbolshy retinde «Namys», «Qaırat TsSKA», «Aqmola», «Esil» jáne «Hımık» klýbtarynda oıyn kórsetken. Bapkerlik jolynda otandyq klýbtarda, Qazaqstan jasóspirimder jáne jastar quramalarynda qyzmet atqardy.
Sondaı-aq Qazaqstan ulttyq quramasynyń bapkerler shtabynda eńbek etti.
2021 jyly «Aqsýmen» Birinshi lıganyń jeńimpazy atansa, 2022 jyly «Qaısarmen» Birinshi lıganyń kúmis júldesin ıelenip, komandany Premer-lıgaǵa shyǵardy. 2023-2024 jyldary «Ulytaý» klýbyn basqardy.
Bas bapkerdiń kómekshisi qyzmetine Ivan Gennadevıch Azovskıı taǵaıyndaldy. Ol — qazaqstandyq klýbtarda jáne Qazaqstan ulttyq quramasynyń bapkerler shtabynda qyzmet atqarǵan tájirıbeli maman.
Eske salsaq, budan buryn pavlodarlyq «Ertis» fýtbol klýby bas bapker Nurbol Jumasqalıevtiń otbasylyq jaǵdaıyna baılanysty óz ótinishi boıynsha qyzmetinen ketkenin málim etti.
