Marat Bısenǵalıev almatylyqtarǵa Mr.Adam biregeı qoıylymyn usyndy

Barmaǵynan bal tamǵan qazaqstandyq skrıpkashy Marat Bısenǵalıev pen onyń orkestri almatylyq jurtshylyqqa klassıkalyq jáne ulttyq mýzyka, vızýaldyq áser, teatr, kıno, dybys jáne sýret aralasqan qoıylymdy usyndy. 16 mýzykant mýzyka tilimen ortasha statıstıkalyq Adam ómiriniń tarıhyn baıandap berdi.

Sahnada oınalǵan barlyq týyndylardyń avtory - búkil álemge tanymal brıtandyq kompozıtor, ser Karl Djenkıns. Marat Bısenǵalıev bolsa, onyń shyǵarmalaryn júrekti tebirentetin tutas tarıh etip shyǵaryp usyndy.

Kásibı mýzykanttardyń ser Karl Djenkınstiń shyǵarmashylyǵyna kózqarasy ártúrli. Bireýler onyń mýzykasyn úzdik týyndyǵa jatqyzbaıdy. Biraq kózge jas úıirip, júrekti qozǵaıtyn «Passakalııa» nemese «Palladio» sııaqty týyndylaryn estigen kezde, barlyq syn bir sátke umytylady. Marat Bısenǵalıev osyny kórsete bildi. 

Mr.Adam premerasynda Karl Djenkınstiń sımfonııalyq sıýıtteriniń «Tilep», «Abaı», «Sary qyz» qazaq taqyrybyndaǵy úzindileri oınaldy. Munda kompozıtor tek qazaq halyq áýenderin, Abaı ánderin negizge alǵan. Mr.Adam-da bul epızodtar tek skrıpka, alt jáne vıolonchelde emes, daýylpaz, saz-syrnaı, sybyzǵy, qyl-qobyz, shań-qobyz (vargan) sııaqty ulttyq aspaptarda oryndalǵan. 

Mr.Adam visuale kontsertiniń shyǵarmashylyq, tehnıkalyq tosynsyılary kóp boldy. Jarqyraǵan jıektemelerdiń ishinde bolǵan mýzykanttar sahnada júrgende, arnaıy adamdar bul jıektemelerdi artynan jyljytyp otyrdy. Jıektemeler ári shyny, ári ekran boldy - olarǵa sýretter proektsııalanǵan. 

    Dybysty berýdiń eń ozyq júıeleri toǵysqan. Jaryqdıodty panelge symsyz taratqysh kómegimen sahnada ornatylǵan DMX symsyz belgisi jiberiledi. Belgi árbir 16 jıektemede ornatylǵan basqa DMX-taratqyshtarǵa da jiberiledi. Osynyń barlyǵy qashyqtyqtan basqarylady. Beıneproektsııa úshin eń sońǵy júıe qoldanylǵan. Perımetr boıynsha arnaıy beınetaspalar ornatyldy.

 Kontserttiń tehnıkalyq bóligi Máskeýde ázirlengen, qoıýshy rejısseri - Máskeýdegi Mıhaılov teatryndaǵy opera trýppasynyń kórkemdik jetekshisi Vasılıı Barhatov.  Ol Mr.Adam-daǵy kóptegen ıdeıalardyń avtory. Sondaı-aq jobaǵa kóp eńbek sińirgen - onyń bas prodıýseri Qaırat Kúlbaev.

«Buǵan deıin jaryqqa shyqqan «Dybys energııasy» jobasy - bul tolyǵymen meniń jobam, onda men Astanada ótken EKSPO-2017 kórmesindegi búkil álem ıdeıasyn usynǵanmyn. Mr.Adam - col týyndynyń jalǵasy, tek kameralyq sıpatta. Adam ómiri týraly baıandap berý ıdeıasy - Qaırat Kúlbaevtiki. Biz shyǵarmamyzda adam ómirin týylǵan sátinen bastap sońyna deıin sýrettedik. Mıkrofondardyń kómegimen akýstıkalyq zalda oınaǵandaı áser qaldyrdyq. Men 1750 jylǵy skrıpkada, Djozef Galıanonyń aspabynda oınadym. 21-23 jeltoqsan kúnderi Mr.Adam Astana jurtshylyǵyna kórsetiledi. 2019 jáne 2020 jyldary biz Eýropa, Taıaý Shyǵys, Azııa elderine úlken týrne jasamaqpyz», - deıdi Marat Bısenǵalıev.

Avtor - Albert Ahmetov