Marat Beketaevty ustaýǵa aýdıtorlyq palata derekteri yqpal etýi yqtımal – Álıhan Smaıylov

ASTANA. KAZINFORM – QR Joǵary aýdıtorlyq palatasynyń tóraǵasy Álıhan Smaıylov burynǵy mınıstr Marat Beketaevtyń ustalýyna palata qorytyndysy yqpal etkenin aıtty.

«2023 jylǵa arnalǵan memlekettik aýdıt obektileriniń tizimine sáıkes, Joǵary aýdıtorlyq palata Ádilet mınıstrliginde jáne onyń vedomstvolyq baǵynysty uıymdarynda jekelegen bıýdjettik baǵdarlamalar boıynsha respýblıkalyq bıýdjet qarajatyn paıdalanýǵa qatysty aýdıtorlyq is-sharalar ótkizdi. Bizdiń qorytyndylarymyzdy QR Sybaılas jemqorlyqqa qarsy is-qımyl agenttigi aldy jáne osyǵan baılanysty adamdardyń jekelegen toby ustaldy. Beketaevtyń ustalýyna ne sebep bolǵanyn bilmeımin, biraq biz aýdıt júrgizip, tekserý nátıjelerin agenttiktiń alǵany – fakt», - dedi Á. Smaıylov Senat kýlýarynda.

Eske sala keteıik, burynǵy Ádilet mınıstri byltyr qazanda laýazymdyq ókilettigin asyra paıdalandy degen kúdikpen ustalǵan edi.

Antıkordyń málimetinshe, ol talap etilmeıtin qyzmetterdi kórsetýge jyl saıynǵy kelisimsharttar jasaý arqyly úlestes kompanııanyń múddesin qoldaǵan. Eks-sheneýnikti qamaýda ustaý merzimi birneshe ret uzartyldy. Sońǵy ret bıyl 21 mamyrda 2024 jylǵy 21 maýsymǵa deıin qamaý sanktsııalandy.

Bıyl 12 shildede Sybaılas jemqorlyqqa qarsy is-qımyl agenttigi burynǵy Ádilet mınıstri Marat Beketaevqa qatysty tergeý amaldary aıaqtalǵanyn habarlady.

Osyǵan deıin Sybaılas jemqorlyqqa qarsy is-qımyl agenttigi eks-Ádilet mınıstri Marat Beketaev jáne basqa aıyp taǵylǵan tulǵalarǵa qatysty qylmystyq is materıaldarymen tanysyp jatqany týraly habarladyq.