Marat Beketaev: Konstıtýtsııalyq reformalar kezinde qoǵamnyń suranysy eskerildi

NUR-SULTAN. QazAqparat – Elordada «Qazaqstan Respýblıkasynyń Konstıtýtsııasy - qoǵam men memleketti áleýmettik modernızatsııalaýdyń irgeli negizi» taqyrybynda halyqaralyq ǵylymı-praktıkalyq onlaın-konferentsııa bastaldy, dep habarlaıdy QazAqparat tilshisi.

«30 tamyz – bizdiń elimiz úshin aıtýly mereke. Konstıtýtsııa memleket, qoǵam jáne jeke tulǵanyń ómir súrýi men ózara is-qımylynyń negizin quraıtyn, ústemdik pen negizgi rólge ıe ámbebap quqyqtyq akt bolyp sanalady. Elimizde júrgizilgen konstıtýtsııalyq reformalar qoǵamdy demokratııalandyrýdy odan ári nyǵaıtý, demokratııa negizderin, Parlamenttiń rólin kúsheıtý jáne Úkimettiń derbestigin arttyrý týraly negizgi qoǵamdyq suranystardy eskerdi», - deıdi QR Ádilet mınıstri Marat Beketaev.

Onyń aıtýynsha, Konstıtýtsııalyq qundylyqtardy bekitýdegi mańyzdy kezeń – QR Tuńǵysh Prezıdenti - Elbasy Nursultan Nazarbaev bastaǵan konstıtýtsııalyq reforma boldy.

«Prezıdent, Parlament jáne Úkimet arasyndaǵy ókilettikterdi qaıta bólý jáne adam quqyǵyn qorǵaýdaǵy konstıtýtsııalyq baqylaý fýnktsııalaryn kúsheıtý arqyly Konstıtýtsııa qoǵamnyń konstıtýtsııalyq qurylymy men saıası júıesindegi sapaly ózgeristerdi kórsetti. Konstıtýtsııanyń normalaryna súıene otyryp, el basshylyǵynyń strategııalyq durys saıasatynyń nátıjesinde respýblıka aıtarlyqtaı saıası, ekonomıkalyq jáne áleýmettik progreske qol jetkizgenin atap ótý mańyzdy», - deıdi ol.