Marat Beketaev ázirlengen mańyzdy zańdar týraly aıtty
«Birinshiden, «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańyna tolyqtyrýlar engizý týraly» Konstıtýtsııalyq zańy bar. Zańmen partııalyq saılaý tizimderinde genderlik jáne jastarǵa arnalǵan kvotalar engizildi. Áıelder men jastardyń keminde otyz paıyzyn partııalyq tizimge qosý týraly talap qoıyldy. Bul elimizdiń qoǵamdyq-saıası protsesterine áıelder men jastardy belsendi tartý úshin qosymsha quqyqtyq jaǵdaılar jasaýǵa múmkindik berdi», - dedi M. Beketaev.
Sonymen qatar ol «Saıası partııalar týraly» Zańǵa ózgeris pen tolyqtyrýlar engizý týraly» Zańǵa toqtaldy. Ol saıası partııalardy qurý úshin tirkeý talabyn qyryq myń adamnan jıyrma myń adamǵa deıin tómendetýdi kózdeıdi. Zańnyń maqsaty - kóppartııalylyq protsesin odan ári damytýdy qamtamasyz etý, sondaı-aq memlekettik sheshimderdi ázirleý men qabyldaý protsesine jańa saıası partııalardy tartý.
«Aǵymdaǵy jyldyń 25 mamyrynda Memleket basshysy «Qazaqstan Respýblıkasyndaǵy saılaý týraly» Konstıtýtsııalyq zańyna túzetýlerge qol qoıdy. Parlament Májilisine saılaý kezinde saıası partııalardyń ótý shegi jeti paıyzdan bes paıyzǵa deıin tómendetildi, barlyq deńgeıdegi saılaý bıýlletenderiniń nysandaryna «Barlyǵyna qarsy» degen jazýy bar baǵan engizildi. Bul norma saıası básekelestikti arttyrýǵa eleýli úles qosady, sondaı-aq memlekettik saıasatty júrgizý barysynda halyqtyń pikirin kóbirek qamtýǵa jáne eskerýge múmkindik beredi dep paıymdaımyz», - dedi mınıstr.
Úshinshiden, qoldanysqa bıyldyń birinshi shildesinen bastap engiziletin Ákimshilik rásimdik-protsestik kodeks qabyldandy. Bul – bizdiń quqyqtyq júıe úshin jańa qujat.
«Azamattarǵa memlekettik organdar sheshim qabyldaǵanǵa deıin tyńdaý quqyǵy beriledi. Sonymen qatar, azamattarǵa ótinishti resimdeýge, sondaı-aq dáleldemeler bazasyn jınaýǵa kómek kórsetýde sottyń belsendi róli engiziledi. Ákimshilik ádiletti engizý memleket pen qoǵam arasyndaǵy qarym-qatynasqa jańa serpin beredi», - dedi vedomstvo basshysy.
