Marat Báshimov: Raqymshylyqtyń arqasynda naqty kináliler jaýapkershilikten jaltaryp ketpeýi kerek

NUR-SULTAN. QazAqparat – Qańtar oqıǵasyna baılanysty jasalatyn raqymshylyq – naqty kinálilerdiń jaýapkershilikten jaltarýyna sebep bolmaýy tıis. Mundaı pikirdi Sybaılas jemqorlyqqa qarsy qyzmettiń Qoǵamdyq keńesiniń tóraǵasy Marat Báshimov bildirdi, dep habarlaıdy QazAqparat tilshisi.

«Mysaldan bastaıyn. Máselen, dalada qarny ashyp júrgen azamat dúkennen bir taǵamdy urlap aldy delik. Ol jaǵdaıda oǵan hattama toltyryp, qylmystyq jaýapkershilikke tartylady. Al endi Qańtar oqıǵasyn alaıyq. Munda azamattar tobyrǵa erip, dúken tonap, ózgeniń múlkin syndyryp ketti. Osy oraıda kóbi olardy jaýapkershilikke tartpaý kerek degen pikirdi aıtyp jatady. Degenmen ony eshkim qylmys jasaýǵa ıtermelegen joq qoı. Ádilettilik – ımannan bastaý alýy kerek. Qoǵamda Qańtar oqıǵasyna baılanysty kóptegen suraqtar týyp turdy. Sondyqtan Prezıdent raqymshylyq jasaý sheshimin qabyldap otyr. Muny «gýmanıstik akt» dep ataýǵa bolady. Aqylǵa salyp, sanaly saraptalǵan sheshim», - dep pikir bildirdi Marat Báshimov.

Sonymen qatar, zańger kez-kelgen iske qatysty raqymshylyq jasaý protsesi óte kúrdeli zerdeleýden ótetinin atap ótti.

«Men QR Prezıdenti janynan qurylǵan raqymshylyq kommısııasynda jumys isteımin. Іsti raqymshylyqqa keltirý úshin talaı protsedýradan ótkizý kerek. Óıtkeni, zań jaýapkershiligi bar. Ol azamattyq nemese ákimshilik quqyqbuzýshylyq áreketine barǵan joq, Ol qylmystyq is jasap otyr. Sondyqtan Qańtar oqıǵasyna baılanysty jasalatyn raqymshylyq – naqty kinálilerdiń jaýapkershilikten jaltarýyna sebep bolmaýy tıis», - dedi Sybaılas jemqorlyqqa qarsy qyzmettiń Qoǵamdyq keńesiniń tóraǵasy.

Buǵan deıin Marat Báshimov Prezıdenttiń Qazaqstan halqyna arnaǵan Joldaýynda kótergen sot reformasyna qatysty pikir bildirgen edi.