Marat Báshimov Parlament Májilisiniń quramynan ne kútetinin aıtty

NUR-SULTAN. QazAqparat – Ulttyq qoǵamdyq senim keńesiniń múshesi, Eýropalyq quqyq jáne adam quqyqtary ınstıtýtynyń dırektory Marat Báshimov Parlament Májilisiniń quramynan ne kútetinin aıtty, dep habarlaıdy QazAqparat tilshisi.

«Endi basqa Parlament quramy bolady. Óıtkeni Prezıdenttiń Parlament quramynyń 30 paıyzy jastar men áıelderden turýy kerektigi jónindegi bastamasynyń ózi qazirgi Parlamenttiń quramyn edáýir ózgertkeli tur. Jastar kele jatyr. Oılary, paıymdary, talaptary basqa. Ózim de Parlamentte jumys istegen adammyn. Eń alǵash 2001 jyly Parlamenttiń esigin ashqanymda tań qalǵanym bar. Senattyń eski ǵımarattarynda kileń 60-70 jastaǵy aqsaqaldar otyratyn. Sol kezde Parlament qabyrǵasyna qashan jastar keler eken dep oılaıtyn edim. Mine, qazirgi jaǵdaıdy men óte pozıtıvti faktor dep sanaımyn», - dedi Marat Báshimov elordada ótken «SAILAU-2021: Parlament saılaýynyń aldyn ala qorytyndylary» atty saraptamalyq talqylaýda.

Sarapshynyń aıtýynsha, partııalar Parlamentke usynyp otyrǵan qazirgi azamattardyń kóbi azamattyq ustanymymen elge tanylǵan adamdar. Sol sebepti ol Parlament pen halyqtyń arasynda keri baılanys kúsheıer degenge senim bildirdi.

Marat Báshimov keıingi jyldary atqarýshy bıliktiń ashyqtyǵyna kóbirek kóz jetkizip kele jatqanyn aıtady.

«Endigi kezekte osy Parlamenttiń túr-tulǵasy tolyǵymen ózgerer degen oıdamyz. Azamattyq qoǵammen, Úkimettik emes uıymdarmen, BAQ-pen yntymaqtastyqty nyǵaıtatyn Parlament bolar degen úmittemiz», - dedi Marat Báshimov.