Marat Bashımov beıbit jıyndar ótkizýge arnaıy oryn belgileýge qatysty pikir bildirdi
«Biz úshin eń bastysy - Azamattyq jáne saıası quqyq týraly halyqaralyq pakti men QR Konstıtýtsııanyń júzege asyrylýy. Óz quqyǵyńdy júzege asyrý, bul rette jıyn ótkizý kezinde ózge tulǵalardyń quqyqtaryna nuqsan kelmeýi tıistigin jıi esten shyǵaryp alamyz. Konstıtýtsııada naqty quqyqtyq prıntsıp bekitilgen. Sondyqtan da zań jobasy jıyn ótkizý quqyǵy bolǵanymen ózge tulǵalardyń quqyqtaryna nuqsan keltirilmeýi úshin talqylanyp otyr», - dedi Marat Bashımov «Qazaqstan Respýblıkasynda beıbit jıyndar, sherý, pıketter, demonstratsııalyq jınalystardy ótkizý men uıymdastyrý tártibi týraly» zań jobasyn qoǵamdyq tyńdaý barysynda.
Onyń atap ótýinshe, kez kelgen jerde ruqsat etilmegen jıynnyń ótýi qala turǵyndarynyń qozǵalysyna jıi qolaısyzdyq týdyryp jatady.
«Kóshelerdi jaýyp tastaǵan sáttiń ózimizge óte qolaısyz bolatyndyǵyn jaqsy bilesizder. Máselen, elordada sol jaǵalaýdy oń jaǵalaýmen negizinen 2 kóshe jalǵap jatyr. Eger osy eki kósheni jaýyp tastasa bolǵany keptelis paıda bolady. Al arnaıy oryn belgilengende jaǵdaı jasalady. Buǵan qosa, oryn kólik ınfraqurylymy eskerile otyryp qalanyń ortasynan berilmek», - dedi saıasattanýshy.
Sonymen qatar ol beıbit jıyn ótetin orynnyń naqty qaı jer ekendiginiń belgisizdigi jýrnalıster jumysyna da qolaısyzdyq týdyratyndyǵyna nazar aýdartty.
«Ózim de jýrnalıspin. Beıbit jıyn ótetin oryn belgilengen bolsa, onda bul bizdiń jumysymyzǵa óte qolaıly. Naqty orynnyń bolmaýy qıyndyqtar týyndatady. Tipti olardy izdep tabýdyń ózi qıynǵa soǵady. Búginde jýrnalıster úshin jedeldik óte mańyzdy», - dedi ol.
Aıta keterligi, qoǵamdyq talqylaý barysynda QR Aqparat jáne qoǵamdyq damý vıtse-mınıstri Danııar Esın zań jobasynda beıbit jıyndardy shetki aımaqtan emes, mamandandyrylǵan oryndarda, sonymen qatar máslıhat quziretimen bekitilgen oryndarda ótkizý kózdeletindigin aıtqan edi.
