Marat Ázilhanov: Shettegi qandastarǵa qazaq tilin úıretetin onlaın-synyptar sanyn kóbeıtý kerek

NUR-SULTAN. QazAqparat - Aqparat jáne qoǵamdyq damý vıtse-mınıstri Marat Ázilhanov «Otandastar Qory» kommertsııalyq emes aktsıonerlik qoǵamynyń (KeAQ) basshylyq quramymen kezdesti, dep habarlaıdy QazAqparat QR Aqparat jáne qoǵamdyq damý mınıstrliginiń Telegram kanaly tartqan aqparatqa silteme jasap.

Kezdesý barysynda Qordyń jumysy, jekelegen salalardyń ahýaly jáne bıylǵy jyldyń josparlary týraly aıtyldy. Sondaı-aq, májiliske qatysýshylar 5 memlekette (Reseı – Omsk, Túrkııa – Stambýl, Germanııa – Berlın, Qyrǵyzstan – Bishkek, Ózbekstan - Tashkent) ashylýy tıis mádenı-iskerlik úıleri men shetelderdegi qandastarǵa arnalǵan qazaq tilin úırený onlaı-synyptaryn ashý jobalaryn talqylady.

Qordyń vıtse-prezıdenti Maǵaýııa Sarbasov shetelderdegi qandastar qurǵan qoǵamdyq uıymdarmen birlesip jumys isteýge arnalǵan Memorandýmdarǵa kelisý isi jalǵasyp jatqandyǵyn jetkizdi.

Búginde álemniń 25 memleketinde 62 memorandýmǵa qol qoıylǵan. Sondaı-aq, M. Sarbasov álemniń 12 elinde jalpy aýdıtorııasy 800 adamdy qamtıtyn 22 onlaın-synyptyń jumys istep turǵandyǵyn aıtty.

Óz kezeginde, Marat Ázilhanov shet elderdegi mádenı-iskerlik úılerdi mazmundyq jaǵynan sapasyn kóterý men shet elderdegi qandastardy qazaq tiline úıretýge arnalǵan onlaın-synyptar sanyn arttyrýdy tapsyrdy.