Marat Áıtenovty telefonmen uryp, tistep alǵan burynǵy áıeli aıyppul tóleıdi
ASTANA. KAZINFORM — Búgin Astana qalasynyń qylmystyq ister jónindegi aýdanaralyq soty Shymkent qalasy eks-ákiminiń aǵasy Marat Áıtenovtiń densaýlyǵyna qasaqana jeńil zııan keltirgeni úshin burynǵy áıeli Dana Ateshovaǵa úkim shyǵardy.
«D. Ateshova úıden májbúrlep shyǵarý kezinde úı ıesine qarsylyq kórsetip, M. Áıtenovti úıge kirgizbeı, jábirlenýshini qasaqana uıaly telefonymen soǵyp, ony tistep alǵan. Saldarynan M.Áıtenov jaraqat aldy. Sottalýshynyń kinási jábirlenýshiniń, kýágerlerdiń aıǵaqtarymen, sot-medıtsınalyq saraptama qorytyndysymen jáne is materıaldarymen dáleldendi», — deıdi elorda sotynan.
Óz kezeginde prokýror M. Áıtenovtiń burynǵy áıeline 30 AEK mólsherinde aıyppul salýdy suraǵan.
Al qorǵaýshy tarap oqıǵa men qylmys quramynyń bolmaýyna baılanysty isti toqtatýdy talap etken.
Qylmystyq kodekstiń 108-1-baby 1-bóliginiń sanktsııasy 200 AEK (738 400 teńge) mólsherde aıyppul nemese sol mólsherde túzeý jumysy nemese 200 saǵatqa deıingi merzimge qoǵamdyq jumysqa tartý, ne bolmasa 50 táýlikke deıingi merzimge qamaqqa alý túrindegi jazany kózdeıdi.
Alaıda sot jazany jeńildetetin mán-jaı retinde jas balalardyń bolýyn jáne buryn sottalmaǵanyn esepke alǵan.
«Sot istiń mán-jaıyn eskere otyryp, sondaı-aq sottalýshynyń jeke kásipker ekenin, 3 jas balasynyń bary jáne jazanyń ózge túrin taǵaıyndaý onyń balalarynyń ómiri men tárbıesine áser etýi múmkin ekenin eskere otyryp, sottalýshy D. Ateshovaǵa 20 AEK (73 840 teńge) mólsherinde aıyppul túrindegi jaza taǵaıyndady», — delingen sot úkiminde.
Úkim zańdy kúshine engen joq.
Esterińizge salsaq, elorda turǵyny Dana Ateshova burynǵy kúıeýi Marat Áıtenovtiń polıtseılermen jáne jeke sot oryndaýshylarmen birge úıine kelip, balalardy bir-birlep úıden májbúrlep shyǵarǵanyn, ózin soqqyǵa jyqqanyn áleýmettik jelide jarııalaǵan bolatyn.
Keıinirek Marat Áıtenov ÁQBtK 73-babynyń 1-bóligimen kináli dep tanylyp, 5 táýlikke qamaýǵa alyndy.
Sodan keıin Marat Áıtenovtyń burynǵy áıeline sot sheshimi shyqty.
Aıta keteıik, Marat Áıtenov — Shymkenttiń burynǵy ákimi Murat Áıtenovtyń týǵan baýyry. Murat Áıtenov 2020-2023 jyldary Shymkentti basqarǵan.
Byltyr qyrkúıekte Prezıdent Jarlyǵymen qyzmetinen bosatyldy.
