Marat Ahmetjanovtyń qostanaılyqtarmen kezdesýine Reseı azamattary kelip, alǵys aıtty
ASTANA. QazAqparat – QR Іshki ister mınıstri Marat Ahmetjanovtyń Qostanaı oblysynyń turǵyndarymen kezdesýine Reseı azamattary qatysyp, qazaqstandyq saqshylarǵa alǵys bildirdi, dep habarlaıdy QazAqparat Polisia.kz saıtyna silteme jasap.
«Dosym ekeýmiz Sankt-Peterbýrgten keldik. 2 qazan kúni bizdi belgisiz bireýler tonap ketken bolatyn. Aqsha somasy bolmashy edi. Polıtsııaǵa aryz jazý-jazbaýdy, jalpy bul týraly aıtýdyń qajeti bar ma dep kóp oılandym. 3 qazan kúni jergilikti turǵyndardyń aıtýymen polıtsııaǵa júgindim. Sol kúni keshkisin qylmyskerler quryqtaldy. Qostanaılyq tártip saqshylarynyń jumysyna tańǵaldym. Alǵysym sheksiz», – dedi kópshilik aldynda mıkrofon alǵan Reseı azamaty Nıkıta Sgadov.
Jalpy, «Jastar saraıy» ǵımaratynda ótken mınıstrmen kezdesýge 1500-den astam adam jınalǵan. Kezdesý kórsetilimi mınıstrliktiń jáne oblystyq Polıtsııa departamentiniń áleýmettik jelilerdegi resmı akkaýnttarynda onlaın kórsetildi.
Azamattardy negizinen otbasylyq-turmystyq buzýshylyqtar úshin jaýapkershilikti kúsheıtý, ishki ister organdaryna jumysqa ornalasý, oblystyń shalǵaı aýdandarynda jańa ýchaskelik polıtsııa pýnkterin ashý máseleleri tolǵandyrdy.
Taǵy bir top azamatty M.Ahmetjanov jeke qabyldaǵan.
