Marat Ahmetjanov tasqyn sýdan zardap shekken kókshetaýlyqtarmen kezdesti
KÓKShETAÝ. KAZINFORM – Aqmola oblysynyń ákimi Marat Ahmetjanov Kókshetaý qalasynyń sý basqan aýdandaryn aralap, sýdan zardap shekken Jeleznodorojnaıa jáne Shalqar kósheleriniń boıyndaǵy úılerdiń turǵyndarymen kezdesti.
Sý tasqynynan zardap shekkenderdiń biri – Samat Baıturynov. Ol 2000 jyldan beri Jeleznodorojnaıa kóshesi 2 meken-jaıy boıynsha ornalasqan turǵyn úıdiń 82 páterinde turady. Qylshaqty ózeni arnasynan asyp, tasyǵan kezde onyń úıine kirgen. Qazirgi kezde ol ýaqytsha basqa páter jaldap turýǵa májbúr.
Turǵyndarmen kezdesýinde aımaq basshysy qazirgi ýaqytta Kókshetaý qalasynyń ákimdiginde materıaldyq zalaldy baǵalaý jáne óteý jónindegi komıssııa qurylǵanyn, sonyń aıasynda zardap shekken turǵyndarǵa jan-jaqty kómek kórsetiletinin atap ótti.
«Bul másele meniń jeke baqylaýymda. Biz zardap shekken turǵyndarǵa kómektesýdiń ártúrli nusqalaryn qarastyramyz. Eshkimde nazardan tys qalmaıdy», - dep atap ótti Marat Ahmetjanov.
Sondaı-aq, oblys ákimi sý basý aımaǵynda bolǵan «Ertóstik» balabaqshasynda bolyp, múddeli memlekettik organdarǵa áleýmettik nysannyń qyzmetin qysqa merzimde qalpyna keltirýdi tapsyrdy.
Aıta ketsek, budan buryn Kókshetaýda sý tasqynynan múlkine zııan kelgen 65 adamnan ótinish túskenin jazǵan edik.
