Marat Ahmetjanov shetelge zańsyz ketken qarajatty qaıtarýǵa qatysty túsinik berdi

NUR-SULTAN. QazAqparat – Májilistiń jalpy otyrysynda Sybaılas jemqorlyqqa qarsy is-qımyl agenttiginiń tóraǵasy Marat Ahmetjanov shetelge zańsyz ketken qarajatty qaıtarý rásimine qatysty túsinik berdi, dep habarlaıdy QazAqparat tilshisi.

«Qazaqstan Respýblıkasynyń keıbir zańnamalyq aktilerine sybaılas jemqorlyqqa qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn birinshi oqylymda talqylaý kezinde depýtat Erlan Saırov zańsyz ketken kapıtaldy elge qaıtarý qadamdary jaıynda suraq qoıdy.

«Prezıdent zańsyz ketken kapıtaldy shetelden Qazaqstanǵa qaıtarý jóninde naqty tapsyrma berdi. Osy oraıda halqymyz naqty ári qarqyndy nátıjeni kútip otyr. Birinshiden, atalǵan zańda qandaı naqty tetikter bar? Ekinshiden, sheteldegi qandaı quzyrly organdarmen jumys júrgizilip jatyr Zańsyz ketken kapıtaldy Qazaqstanǵa qaıtarý protsesi qansha ýaqytqa sozylýy múmkin?», - dep surady E. Saırov.

Óz kezeginde QR Sybaılas jemqorlyqqa qarsy is-qımyl agenttiginiń tóraǵasy Marat Ahmetjanov bul máselede qylmystyq is qozǵalýy kerek ekenin jetkizdi.

«Oǵan (sheteldik quzyrly organdarǵa) quqyqtyq kómek berý úshin tapsyrys jiberýimiz kerek. Eki jaqpen, ıaǵnı sol elmen quqyqtyq kelisim bolýy kerek. Biz sanktsııalap, tıisti suranys jiberemiz. Bul turǵyda sheteldegi quqyq qorǵaý organdary múlikti (zańsyz shyǵarylǵan) zerdeleıdi. Osy oraıda bizdiń suranys boıynsha sanktsııalap, shekteý qoıylýy tıis. Budan keıin sottalǵan kezde, búkil dálelderin bergen kezde, zańsyz ári qylmys jolymen alynǵany naqtylaǵanda, olar bizge qylmystyq protsespen tolyq qaıtarýǵa múmkindigi bolady», - dep túsindirdi agenttik basshysy.

Onyń aıtýynsha, zańsyz ketken kapıtaldy Qazaqstanǵa qaıtarý protsesi boıynsha Bas prokýratýranyń bastamasymen tıisti toptar quryldy. Onyń ókiletti organy – Qarjylyq monıtrıng agenttigi, Bas prokýratýra jáne Sybaılas jemqorlyqqa qarsy is-qımyl agenttigi. Sol jumys aıasynda zańǵa sáıkes tásilder eskerilgen.

Sonymen qatar ol búgin talqylanǵan zań jobasy aıasyndaǵa negizsiz baıýǵa tosqaýyl qoıý qadamdaryna toqtaldy.

«Negizsiz baıýǵa qatysty toqtalsaq, zań qabyldanǵan kezde, adam qarajattyń qaıdan kelgenin túsindire almasa, zańǵa silteme jasap aktıvterdi qaıtarýǵa múmkindigimiz bar», - dedi M. Ahmetjanov.

Budan buryn habarlanǵandaı, agenttik basshysy azamattardyń shyǵyndary zańdy tabysynan negizsiz asyp ketkende qandaı sharalar qabyldanatynyn túsindirdi.