Marat Ahmetjanov Pavlodar oblysyndaǵy jemqorlyqpen kúres jumystarymen tanysty
Sapar barysynda vedomstvo basshysy men oblys ákimi A. Sqaqov Pavlodar oblysynyń Sıtýatsııalyq-taldaý ortalyǵynyń jumysymen tanysty. Ortalyq jedel basqarý sheshimderin qabyldaý jáne óńir damýynyń asa mańyzdy kórsetkishterin monıtorıngileý, taldaý jáne boljaý úshin qurylǵan. Munda tóraǵa men aımaq basshysyna «E-nátıje» aqparattyq júıesiniń jumysy tanystyryldy.
Sondaı-aq, Agenttik tóraǵasy óńir aktıvimen keńes ótkizdi. Óz sózinde ol Agenttik qyzmetindegi basty basymdyq – sybaılas jemqorlyqtyń aldyn alý jáne eskertý ekenin atap ótti.
Memlekettik organdardyń sybaılas jemqorlyqqa qarsy is-qımyly boıynsha qyzmetin baǵalaý júıesi – preventsııanyń tıimdi quraldarynyń biri. Olardyń qataryna, mysaly, memlekettik satyp alýlardyń ashyqtyǵy men zańdylyǵy, qaramaǵyndaǵy qyzmetkerlerdiń sybaılas jemqorlyq boıynsha qylmystyq, ákimshilik jáne tártiptik jaýapkershiliginiń jaı-kúıi, memlekettik organnyń ashyqtyǵy men qoǵamdyq pikir jatady.
«Bul rette, sybaılas jemqorlyq úshin jazanyń bultartpastyǵy qaǵıdatyn eshkim joıǵan joq dep erekshe atap ótkim keledi. Bul zulymdyqpen biz barynsha aıaýsyz kúresetin bolamyz», – dedi M. Ahmetjanov.
Vedomstvo basshysy barlyq memlekettik organdarda jobalyq basqarýdy engizý týraly taǵy bir talap baryn aıtty.
«Bul talap Úkimet Qaýlysymen bekitilgen. Jobalyq basqarý júıesiniń negizgi baǵyttarynyń biri – «sybaılas jemqorlyqtyń aldyn alý jáne oǵan qarsy is-qımyl». Ony Agenttik úılestiretin bolady», – dep atap ótti spıker.
Odan ári Antıkor basshysy ınvestorlar men kásipkerlerge qyzmet kórsetý ortalyǵynyń jumysymen tanysyp, aýyl sharýashylyǵy salasyndaǵy aýyl sharýashylyǵy taýar óndirýshilerimen, «QazAgro» jáne mıkroqarjy uıymdarynyń ókilderimen kezdesý ótkizdi. Agenttik tóraǵasy Prezıdenttiń tapsyrmasy boıynsha agroónerkásip keshenindegi sýbsıdııalaý salasyna júrgizilip jatqan aýqymdy taldaý týraly aıtyp berdi.
Atap aıtqanda, júrgizilip jatqan jumystyń aralyq nátıjeleri usynyldy.
Osy rette, aýyl sharýashylyǵy taýarlaryn óndirýshi bolyp tabylmaıtyn kásiporyndarǵa sýbsıdııa tóleý faktileri anyqtaldy. Mysaly, Pavlodar, Túrkistan jáne Almaty oblystarynda aýyl sharýashylyǵy ónimderin óndirýge qatysy joq 279 kásipkerlik sýbektisine asyl tuqymdy mal sharýashylyǵyn qoldaý salasy boıynsha 1 mlrd teńgege jýyq sýbsıdııalar berildi. Olar: sulýlyq salondary, farmatsevtıkalyq kompanııalar, jyljymaıtyn múlikti jalǵa berý, avtokólikti jóndeý jáne t. b.
Sóz sońynda M.Ahmetjanov mundaı nemquraısyzdyqtyń, jaýapsyzdyqtyń jáne aýyl sharýashylyǵy basqarmalarynyń tarapynan baqylaý bolmaýynyń saldarynan jalpy sala zardap shegip otyrǵanyn aıtty.
Óz kezeginde, kezdesýge qatysýshylar ótinim berýden bastap sýbsıdııa berilgenge deıingi aralyqta ashyqtyqty qamtamasyz etý boıynsha óz usynystaryn engizdi. Sondaı-aq, sýbsıdııa berý máselelerinde sybaılas jemqorlyq pen bıýrokratııa deńgeıin tómendetý, bıznesti júrgizýge kedergi keltiretin ákimshilik kedergilerdi joıý boıynsha sharalar usyndy.
Tóraǵa sondaı-aq sapar barysynda Pavlodar oblysy boıynsha Sybaılas jemqorlyqpen kúres qyzmetiniń ókildgine bardy. Onda ol esepti kezeńdegi qyzmet nátıjelerimen tanysyp, jeke quramnyń aldyna birqatar naqty mindetter qoıdy.
