Marat Ahmetjanov Qosshy qalasy úleskerleriniń problemasyn sheshýge ýáde berdi

ASTANA. KAZINFORM – Aqmola oblysynyń ákimi Marat Ahmetjanov Qosshy qalasyndaǵy turǵyn úı úleskerleri máselesiniń tolyq sheshiletinin aıtyp, sendirdi.

- Biz ınvestor taýyp, ákeldik, qazir 9 qabatty 100 páterli turǵyn úıdiń qurylysy bastalady. Qosshynyń qala kúnine aıaqtaýdy josparlap otyrmyz. Jalpy barlyq úleskerdiń máselesin 100 paıyz sheshemiz. Bıyl jospar boıynsha sheshetin bolamyz, sebebi sot úkimderi bar, quryltaıshy tulǵalar sottaldy, - dedi Marat Ahmetjanov oblystyń áleýmettik-ekonomıkalyq damý barysy týraly esep bere turyp.

Aıta ketsek, Qosshy qalasyndaǵy úlestik qurylys máselesi kóp jyldar boıy sheshilmeı keledi.

Osylaısha oblys basshysy jaqyn arada barlyq úlesker óz páterin alatynyna sendirip otyr. Desek te másele kezeń-kezeńimen sheshiledi.

Sondaı-aq Marat Ahmetjanov salynyp jatqan turǵyn úı qurylysymen jeke tanysqanyn tilge tıek etti.

Buǵan deıin óńir basshysy Kókshetaý qalasynda 150 eski turǵyn úı renovatsııadan ótetinin aıtty. 

Aıta keteıik, bıyl Aqmola oblysynyń sharýalary 6,6 mln tonna rekordtyq astyq jınady.