Marat Ahmetjanov Kókshetaýdaǵy jańa JEO qurylysy týraly: 2029 jylǵa qaraı búkil qala jylýmen qamtylady

ASTANA. KAZINFORM — Bıyl jylý elektr ortalyǵynyń jobalyq-smetalyq qujattamasy, ýaqytsha nysandar, jol, uńǵymalar men basqa da qajetti ınfraqurylym daıyndaldy. 

— Keler jyly qurylys jumysy belsendi bastalady. Sonymen qatar, qala ınfraqurylymy da ázirlenip jatyr. Saryarqa shaǵyn aýdanynda alǵashqy jylý berý 2028 jylǵa josparlanǵan, al 2029 jylǵa qaraı búkil qala jylýmen qamtamasyz etiledi, — dedi Aqmola oblysynyń ákimi Marat Ahmetjanov ortalyq kommýnıkatsııalar qyzmeti alańynda óńirdiń áleýmettik-ekonomıkalyq damý áleýeti týraly esep bere turyp.

Óńir basshysy keltirgen málimetke súıensek, qazir Kókshetaý turǵyndary aı saıyn tek sýdy jylytýǵa shamamen 9–10 myń teńge tóleıdi, al jańa jylý elektr ortalyǵy kóptegen máseleni sheshedi.

— Odan bólek, biz 500 myń turǵynǵa arnalǵan qalanyń jańa bas jospary ázirlenip jatyr. Ony Memleket basshysy jumys sapary barysynda maquldady. Kókshetaýdy tartymdy ortalyqqa aınaldyryp, turǵyndarǵa jaıly ómir súrý jaǵdaıyn qamtamasyz etýge daıynbyz, — deıdi ákim.

Eske salsaq, 2024 jyly sáýirde Qazaqstan Respýblıkasy men Reseı Federatsııasynyń energetıka mınıstrlikteri arasynda Kókshetaý, Semeı jáne Óskemen qalalarynda JEO salý jobalary boıynsha yntymaqtastyq týraly kelisimge qol qoıyldy. 

Aıta keteıik, byltyr Kókshetaýdaǵy jylý elektr ortalyǵynyń qurylysy bastalatyny aıtylǵan edi.