Marat Ahmetjanov esirtki jarnamalaýshylardy jazaǵa tartý nelikten qıyn ekenin túsindirdi

ASTANA. QazAqparat – Esirtki jarnamalaıtyn saıttardyń shetelde tirkelýi qlymyskerlerdi jazalaýda qıyndyq týǵyzady. Bul týraly QR Іshki ister mınıstri Marat Ahmetjanov QR Prezıdent teleradıokesheniniń «Úsh suraq» baǵdarlamasynda aıtty, dep habarlaıdy QazAqparat tilshisi.

«Ókinishke qaraı, búgingi tańda sıntetıkalyq esirtkiniń taralý aýqymy ulǵaıyp kele jatyr. Sondaı tendentsııa bar. Byltyr 14 keli sıntetıkalyq esirtki tárkilense, bıyl 105 keli tárkilendi. Onyń ústine bizdiń elimizdiń aýmaǵynda da kóleńkeli zerthanalary paıda bola bastady. 8 aıdyń ishinde 33 osyndaı zerthana men esirtki prıtony joıylyp, 11 tonnadan astam esirtki zaty tárkilendi», - dedi mınıstr.

Vedomstvo basshysy qazir mınıstrlik atalǵan jaǵymsyz qubylysty qalaı aýyzdyqtaý kerektigin oılastyryp, zerttep jatqanyn atap ótti.

«2020 jyly zańnamaǵa esirtkini jarnamalaý boıynsha qylmystyq bap engizdik. Sonyń arqasynda 8 aıdyń ishinde 1772 esirtki saıtyn buǵattadyq. Biz mundaı áreketti aýyr qylmys sanatyna jatqyzdyq. Sonyń aıasynda óte uzaq merzimge bas bostandyǵynan aıyrý jazasy qarastyrylǵan. Biraq ondaı qylmysty ashý óte qıyn. Óıtkeni ol saıttar el aýmaǵynan tys jerden jumys istep turǵan bolýy múmkin. Bul problemaǵa eski tásilmen kelsek, jumysyzǵa kemshilik bolyp tıer edi. Óıtkeni bizde ondaı qylmystar tirkelgenimen ashylmaı qalýy yqtımal edi. Sonyń kesirinen ashylmaǵan qylmystar sany artatyn edi. 1772 saıtty buǵattaýymyz esirtki aınalymynyń aıasyn taryltyp, kóptegen keleńsizdiktiń betin aldy deýge bolady», - dedi |Marat Ahmetjanov.

Vıdeodan alynǵan kadr