Marat Ahmetjanov bank qyzmetkerlerin kepilge alǵan kúdiktiniń qandaı talap qoıǵanyn aıtty

ASTANA. QazAqparat – Kepilge alynǵan bank qyzmetkerleri bosatylǵannan keıin Іshki ister mınıstri Marat Ahmetjanov oqıǵanyń mán-jaıyn aıtyp berdi, dep habarlaıdy QazAqparat tilshisi.

«Talaptary zańsyz jáne olar ártúrli boldy. Men ishke kirip, onymen (kepilge alǵan er adam – avtor túsindirmesi) sóılestim. Ol belgili bir shottarǵa aqsha aýdarýdy, týystary men jaqyndaryna kómektesýdi surady. Sóılesý úshin biz onyń týystaryn kelissózge tarttyq. Biraq, ol olardyń aıtqanyna kónbedi. Sondyqtan, arnaıy operatsııa arqyly kúshpen alý kerek boldy», - dep jaýap berdi Marat Ahmetjanov jýrnalıster saýalyna oraı.

Eske salaıyq, elordadaǵy Kaspi banktiń ǵımaratynda qarýlanǵan er adam birneshe kisini kepilge alǵanyn habarlap edik.

Polıtsııa qyzmetkerleri kepilge alynǵan adamdardy bosatty.

Іshki ister mınıstri Marat Ahmetjanov qazir kúdiktige qatysty tergeý amaldary júrip jatqanyn málim etti.