Marat Ahmetjanov Astana irgesindegi aýyldarda jaryq nege jıi óshetinin aıtty
Astana irgesindegi aýyldardyń elektr qýatymen baılanysty problemalary Úkimettiń arnaıy qaýlysy negizinde sheshimin tabady. Aqmola oblysynyń ákimi Marat Ahmetjanov ortalyq kommýnıkatsııalar qyzmetinde ótken brıfıngide osyndaı málimet aıtty, dep habarlaıdy Kazinform.
«Astana irgesindegi Qoıandy, Qaraótkel, Jibek joly sekildi aýyldar men Qosshy qalasy áldi kúnge deıin kómir jaǵyp otyr. Gaz qashan tartylady?» - dep surady jýrnalıst.
Ákimniń sózinshe, atalǵan eldi mekenderge gaz tartý baǵytynda jobalaý-smetalyq qujattar ázirlengen. 2024 jyly birneshe eldi mekende jumys bastalmaq.
«Jalpy Arshaly aýdanyna gaz jetti. 16 eldi meken gazdandyryldy. Endi osy joba aıasynda Jibek joly aýyly 17-shi eldi meken bop kirgeli otyr. Bul jerde obektıvti de, sýbektıvti de jaǵdaılar bar. Resmı sanaq boıynsha alsaq, sol Jibek jolynda 10 myń adam ǵana turady. Al negizgi halyq sany 30 myńnan asyp tur.
2024 jylǵa degen jospar bar. Jobalaý-smetalyq qujattar daıyn. Gaz irgege jetse boldy, jumystar bastalady. Naqty aıtsaq, Jibek jolynan bólek Qoıandy, Qaraótkel, Talapker, Taıtóbe aýyldary men Qosshy qalasy bar», - dedi ákim.
Sondaı-aq, ol Astana irgesindegi aýyldarda elektr jaryǵy nege jıi óshetinin aıtty.
«Bul máseleniń óz tarıhy bar. Úkimet qaýlysyn daıyndap jatyrmyz. Ondaǵy jeke turǵyn úılerdiń kóbi satyp alynǵan telimde boı kótergen. Onyń tarıhyn ózińiz de biletin shyǵarsyz. Jeke adamdar qosalqy stansa qoıyp, halyqqa elektr qýatyn taratqan. Árıne, osyndaı qosalqy stansanyń keıbir ıeleri zańdy tulǵa retinde memleketten qosymsha qarjy talap etip otyr. Qazirgi tańda elektr energııasy salasyndaǵy búkil qujattardy memlekettik etý josparda bar. Jobalaý-smetalyq qujattary daıyn. Sonyń bári zaman talabyna saı etip salynady. Bári kommýnaldyq menshikke alynyp, turǵyndar jeke tulǵa retinde ortaq tarıf boıynsha tóleıtin bolady. Ony biz qazir zańdastyrý máselesimen aınalysyp jatyrmyz. Keıbirin kelisimshart arqyly memleket balansyna alamyz ne bolmasa jańadan stansa ornatamyz. Ondaı másele Qosshyda da bar. Qoldan jasalǵan júıeler bar. Qaty jel oqsa, sónip qalady. Ony da bilemiz. Sondyqtan qazir osyndaı josparmen máseleni tehnologııa talaptaryna saı sheshemiz. Astana aglomeratsııasyn damytý týraly Úkimet qaýlysy qabyldanǵan soń kirisemiz. Oblys bıýdjetinen de qarajat bar. Biraq ol jetkiliksiz. Sondyqtan úkimet qaýlysy aıasynda respýblıka bıýdjetinen aqsha bólinedi. Oblysta turaqsyz kóshi-qonnyń qarqynyn da osy máselemen baılanystyrýǵa bolady. Sondyqtan ony túbegeıli sheshýge múddelimiz», - dedi oblys ákimi.
