Marat Ahmetjanov Arnaıy prokýrorlar qyzmetiniń eks-basshysy týraly aıtty

NUR-SULTAN. QazAqparat – QR Bas prokýrorynyń orynbasary Marat Ahmetjanov Arnaıy prokýrorlar qyzmetiniń burynǵy basshysy Olesıa Kekseldiń isine qatysty pikir bildirdi, dep habarlaıdy QazAqparat tilshisi.

Atalǵan fakti boıynsha sotqa deıingi tergeý amaldary júrip jatyr. Osy jaıynda iske qatysty tolyq baǵalaýdy aldyn ala tergeý aıqyndaıdy. Sondyqtan tek sot qana osy áreketterge adamnyń kináli nemese kináli emestigine qatysty úkim shyǵarady. Osy faktilerdiń barlyǵy tekserilip, tıisti quqyqtyq baǵalaý jasalady. Sondyqtan sońǵy sheshim shyǵarylǵannan keıin barlyq faktiler boıynsha túsinik beriledi. Osyǵan sáıkes tergeý barysynyń mán-jaıyn jarııa ete almaımyn», - dedi Ahmetjanov Parlament Májilisinde tilshiler saýalyna jaýap bere otyryp.

Sonymen qatar ol Olesıa Keksel qyzmetinen óz erkimen ketkenin naqtylady.

«Ol tıisti ótinishin berdi jáne Bas prokýror bul ótinimdi qanaǵattandyrdy. Ol qazirgi kezde Qazaqstan aýmaǵynda», - dedi Marat Ahmetjanov.

Budan buryn habarlanǵandaı, QR Іshki ister mınıstri Erlan Turǵymbaev Bas prokýratýranyń Arnaıy prokýrorlar qyzmetiniń burynǵy basshysy Olesıa Kekseldiń ne úshin tergelip jatqanyn aıtty.

«Bas prokýratýraǵa bir azamattan shaǵym tústi. Ol shaǵymynda ózine qatysty tergeý barysynda Bas prokýratýranyń Arnaıy prokýrorlar qyzmetiniń burynǵy basshysy Kekseldiń tarapynan túsinik berý bóliginde tergeýge jatpaıtyn ádisti qoldanǵanyn aıtqan»,- dedi QR Іshki ister mınıstri Úkimet otyrysynan keıin BAQ ókilderine bergen suhbatynda.